塵埃落定

塵埃落定

「瘋」采依然，咭咭！

這段時間好忙...... 忙乜？

自老伴二月退休後，佢有啲不大適應﹔以前每日早上六時半，醫院有電話打嚟問佢番唔番Extra，退休後就冇咗個咁準時嘅「鬧鐘」。一向唔係咁喜歡出門嘅老伴整天無所事事呆喺家裏，幸好兩老有共同喜好，一個星期往往有四日都會打打羽毛球。喺球會中，兩老並非頂尖兒高手，只不過係一般技術，不過兩老頗喜歡鑽研，五六年前就開始做教練副手，睇人家點樣教，邊幫邊學，為自已設計一套訓練方法，而呢套方法係針對耆英而設，主要係安全為主，先以步法（foot work）開始，保証長者喺塲上跑動唔會跌倒，或因步法錯誤而弄傷足踝及膝關節，當然唔會有跳起殺球（jump smash）呢類動作。其次才是板法（racket work），呢兩者雖然係相輔相成，但對耆英長者，老雨會非常非常强調安全，因為曾見過有耆英喺球場因步法失誤跌傷，兩手腕骨同時折斷。這幾年間喺球會教過七八個初級課程，而最近嘅幾個課程，老伴會在旁協助，所謂「夫婦同心、其利斷金」。一百五十人嘅球會中，有四十幾個長者球員係参加過老雨初級課程而仍然喺塲上拼搏，記憶中好似冇一個因為步法錯誤引致跌倒受傷，呢點係老雨引以沾沾自喜。

一般初級課程只重點教授步法，板法係按教步法需要而練習；舉個例說，球員一般打負手球會較弱，比賽塲上會重點攻擊對方負手，特別係負手高遠球（back hand clear），要長者轉身去回擊，整個過程由起步到擊球，具一定危險性和容易有不同程度受傷，所以教授這種「組合」動作每一個移動都要很着意安全，單有步法或單有板法都不行。以前嘅課程大多係四至六課，每課兩小時，而今次嘅課程係十六課，所以老雨要用大量時間去步署同研究整個訓練，要適應長者體質、特點，編排一個既一絲不苟，但又能好似幼稚園那樣循序漸進、從遊戲中學習嘅課程。課程四月開始，至現在經已過半，反應良好，學員自己亦覺得有進步同學懂好多以前唔識嘅打法。

以上嘅忙，可以講係可以順手拈來，憑老雨多年經驗同喺網上包括 youtube等等資訊，將之歸納分類重新安排便可以。以下嘅忙就超出老雨同老伴日常所懂嘅知識範圍之外.... 買樓。

去年卓藍帶兩老参觀卑詩大學工程系校園

係呀！老雨冇寫錯、你亦冇睇錯，真係買樓。事緣係大公子卓藍五月又大學畢業..... 又大學畢業？係呀！佢讀完一個學位，做咗兩三年嘢，又走番去讀第二個學位，兩個學位都係地質，而兩個都係地質工程師學位，所分別嘅係第一個係鑽探分析，而剛完成嘅係地質土木工程。以香港現時工程而言：珠港澳大橋工程，要先勘探土質，鑽取土質樣本分析得數據，這是第一個學位所學。第二個學位所學嘅土木工程係根據數據計算出土地能承受壓力計算上面結構、樁架要有多深，承受水流風速等等。以加拿大而言：加國礦產豐富，有大數量存礦仍未被發現，鑽探公司便做土質分析，大範圍鑽採，將分析報告出售給開礦集團，這樣生意收入是以億計，鑽探範圍越廣越深（深達三千公呎），數據就越準確。佢今次嘅學位則係處理開礦時挖掘出嚟以萬噸計嘅泥土。

以前工作過嘅地質勘探公司年刋上卓藍嘅照片

卓藍又畢業，不等待五月尾嘅畢業禮，經已有兩家公司offer請佢，佢選咗其中一家，待遇理想，五月五日上班。四年多喺卑詩大學上課，每日花上三個小時車程，卓藍對開車有厭倦，佢向兩老提出 move out，打算租一個接近工作地點嘅單位。

老雨早就有先設一個養老蝸居之念.... 如果卓藍同二公子雋藍大個仔要遷出，兩個老傢伙，要間咁大嘅單户房屋（single house）做乜鬼，二千七百幾平方吸塵掃地都做餐死啦。呢次卓藍一提出，老雨深思熟慮好幾日至開口與老伴相量，要找一個單户單位（apartment），最理想係接近天車站（sky train 等同香港地鐵），因為老雨年紀大了，路上開車反應也慢了，所以遲下會多用公共運輸設備。另外一個要求係要接近兩老日常生活範圍，唔可以冇雷公咁遠..... 當然是價格係可以負擔得起嘅。

用好多時間去分析資料、價目，終於找到一個適合上面條件、有779呎一房單位。透過地產經紀與賣方討價還價，價錢議好後查契、查閱有關大厦單位管理公司所有會議紀錄，大厦在市政府註冊嘅則例（by law），聘專業公司驗屋有否要維修等等..... 這點加拿大喺房地產交易監管做得相當嚴謹，經過近大半個月嘅折騰，終於塵埃落定。

這個單位位於天車站南端，只過一條行人隧道，三五分鐘路程便到站台，平日兩老打羽毛球嘅 Cameron Centre 也不過行七至十分鐘、價錢合理，五月尾交吉。卓藍話俾錢人地租住所，不如俾Dad & Mom喎，佢每月交租俾兩老幫補幫補。遠望一點...... 日後等二公子話大個仔嘞要遷離「大屋」.... 諗咁多做乜，緣起緣滅，無常變化，到時至算啦！

有室內泳池

 健身室

桌球、乒乓球，還有兩個壁球室，兩個室外網球塲

由地面數上去第九層，中間露台嗰間就係嘞

開放式厨房

客飯廳

客廳有趟門可以出露台

客飯廳

露台悠閑座椅

一睡房單位，房間也特別大 （上面啲傢俬係現時業主嘅）

低層單位都能有景遠眺

過馬路就係天車站