2014年5月11日 星期日

絕代双嬌 12 - 13



絕代双嬌 12
文章日期:07/18/2012 03:28 pm




絕代双嬌「吔烏城」冰火對决
第十二回 余軍師運籌帷幄 眾女惡鬥妖狐陣

上文說到葉捕頭葉依秋血戰女鍾馗汝莫愁,葉捕頭持背光之利凌空躍起,趁陽光眩目之際,一葉鏢刺破鬼見愁左眼。謂已扣三鏢,若鬼見愁尚餘一毒針,佢會企定用其中一葉硬接,另两枚則用取汝莫愁性命。


女魔頭恐佈咁詭笑着,伸右手往盛毒針暗器袋一摸……,袋中空空如也,七七四十九支〝黃蜂尾後針〞經已用盡。女鍾馗一向使暗器係每次發射十針,到四十針後,最後一次係八針,通常佢留起最後一毒針喺緊急關頭自盡用,咁點解明明發射咗五次,應該尚餘一針,呢一針去咗邊呢?佢諗咗一諗,心中笑曰:「天亡我也!」佢知道自已用咗第一針去射低多口搭咀嘅手下,女魔頭不動聲色,隻右手仍然放喺暗器袋裏面,左手硬生生將刺喺左眼嘅葉鏢拔出嚟。本來佢殺人如麻,連自己手下都殺,眾奸徒對佢冇好感,但佢經此一拔,各奸眾佩服得五體投地,連聲叫好,不過始終冇一個敢行入戰圈之內。此時,雪山妖狐同九侍婢好似係剛由遠處趕番嚟,見到鬼見愁咁嘅模樣,經已知道情況不妙,正想出手!


鬼見愁忍痛拔出葉鏢,滿面是血,說:「呢次我真係遇到…… 雪狐!我吩咐嘅事辦妥未?」令狐雪點了點頭,汝莫愁續說:「我嘅事,我自己理,給我退下!」面目猙獰嘅女魔頭用左手輕輕將亂咗嘅頭髮撥了撥,側身站用右邊較好看嗰邊面向着葉捕頭。說時遲,那時快,右手從暗器袋取出向葉捕頭一揚,身轉左側,左手向葉捕頭射出那片剛從左眼拔出還滴着血嘅葉鏢……


葉依秋見佢右手一揚,看不准有冇暗器,心中一閃念:「佢明明用盡四十九針,怎可能……唔通我計錯?」不敢怠慢,一片葉鏢循揚手處射去截擊,葉鏢冇擊中任何暗器,反之深深插入鬼見愁右掌中。當此刻一片染血嘅葉鏢迎捕頭眉心而來,閃也不及,葉捕頭扣两鏢把來染血葉鏢打歪,染血葉鏢餘勢仍勁,嘶的一聲,將捕頭嘅帶翎帽子打掉,露出一頭長髮!


葉捕頭最後射出嘅兩鏢,一支擋擊咗染血葉鏢,另一支正插喺鬼見愁嘅咽喉上。汝莫愁沒立時倒地,氣道剌破,佢發音嘶嘶沙沙的說:「你騙我!早知你是女的,我定不放過你。」說罷就一倒裁,真的見閻王去了。


女魔頭倒地,一時羣奸無首,個個面面相覷,有胆小者躍上馬背踢馬而去。捕頭拾起地上帶翎帽子,拍拍塵土載上,向四方拱手朗聲說曰:「有邊位唔服要教量嘅請留下萬兒,今日本捕頭有要事辦,來日必來討教。」呢班平時喺江湖你虞我詐嘅烏合之眾,所謂樹倒猢猻散,各自返回居處搶掠執包袱離去。葉捕頭舒一口氣,望住前面嘅官府衙門,正想步入……

雪山妖狐怎容你救人這容易,持一對精鋼白狐爪站在階前,九侍婢組妖狐陣圍葉捕頭在圈子之內!



遠處傳嚟馬蹄之聲,五騎上三男一女,是芃澎、余樞基、江諾山和剛醒過來;男装打扮、用面紗蒙在眼以下,但仍疲態畢露嘅無艶姑娘。各人勒馬離鞍,芃澎與無艶姑娘一個箭步插入陣中。江諾山奔入官府衙門,見眾女俠兵器,順手携之衝入大牢,擊破牢門將眾女俠救出。真是打破玉籠飛彩鳳,眾女只是吸入小量迷烟至昏倒,冇無艶姑娘這嚴重,經過日多休息經已無恙,眾女各持兵器闖入陣中。


妖狐陣係以北境雪狐羣獵捕時,分工追截、圍剿、阻擊等演變出嚟,與中土其他陣法有異,入陣者經常會覺得俾幾個雪狐侍婢圍攻。八女入陣內力戰連雪山妖狐在內十個雪狐,莫說破陣,四方八面都冇法突圍而出。幾位女俠亦幾乎俾妖狐嘅白狐爪爪中。眾女在想,雪狐陣中除妖狐武功高強外,其九婢皆還可以,但點解咁難打呢了。


呢個時候,有一把聲用南方土話(廣東話掛?)說:「芃、打〝離〞位,守〝兌〞位。」「花前月下、打〝乾〞位,兼攻〝巽〞位」「捕頭退〝坤〞守〝震〞」「妍瓦打〝坎〞攻〝艮〞」「菊進兌退乾」「芃退兌守離」……跟著越說越快,但說得清清楚楚明明白白,各女俠在陣中隨聲所說遊走截擊,刀如疾風劍如電光,一時間,傳聲越嚟越快,眾女俠出招亦越嚟越着點子。北境嘅雪狐未聽過呢啲〝南方土話〞,更加唔知呢啲所說嘅係八卦方位,一時唔知點應付,本來控制大局變全被動捱着打。余樞基怒喝一聲:「撤其武器」,八女齊喝一聲:「着!」連令狐雪在內,所有妖狐兵器皆被八女俠點在地上。幸而狐婢同妖狐均站陣外圍,兵器脫手仍有機逃跑。雪山妖狐回頭喝說:「要知撥墨之秘、福佳石刻見!」一蹦一躍逃去無踪!



葉捕頭拱手向樞基說:「洪湟大俠沒看錯,先生果然是大將之才!多謝!」余樞基說:「大姊!余某慚愧!」芃澎捉住五女等之手,熱淚盈眶,說:「我真怕失去您地啊!」除咗菊無艶冇出過聲外,跟住………呢個「女人墟」又嚟過!



「悲心使」衝前擁抱住菊無艶問:「菊姊,您沒事了嗎?」怎料悲心使頭上髮釵,無意間勾脫咗無艶姑娘嘅面紗……喺無艶一双美目、一個俏麗嘅鼻下,咀唇竟然變咗两條又深又黑又粗嘅〝豬膶腸〞物体……



絕代双嬌 13
文章日期:07/22/2012 08:45 am




絕代双嬌「吔烏城」冰火對决

第十三回 擊破玉籠飛彩鳳 作繭自縛水烏鴉


上回說到眾女俠得余樞基相助,殺敗咗妖狐陣,令狐雪臨退前留下一語:「要知撥墨之秘、福佳石刻見!」


常福鎮自從俾強徒侵佔,今日奸徒雖然俾八女俠清剿,連百多個三山五嶽嘅都走埋,成個鎮更加蕭條;所謂「萬户蕭疏鬼唱歌」,真係鬼影都冇隻!



葉捕頭望住倒在地上汝莫愁,諗記女鍾馗臨終前嘅說話:「你騙我!早知你是女的,我定不放過你。」知汝莫愁定是曾被〝情困〞所害,佢仰天長嘯咗一聲,嘆咗一句,便輕唱出自金代詩人元好問嘅《摸魚兒》:「恨人間,情是何物,直教生死相許。天南地北雙飛客,老翅幾回寒暑。歡樂趣,離別苦,是中更有癡兒女。君應有語,渺萬里層雲,千山暮景,隻影為誰去。」




捕頭不忍心汝莫愁屍橫石階上,眾女俠打交就叻,執死屍梗係得捕頭巡捕嘅專業啦!葉依秋將汝莫愁草草葬喺衙後山空地,清香一縷送走了汝莫愁。



夜!常福鎮除咗「吳係好棧」有八女俠同樞基諾山外,一切死寂。午間葉捕頭收拾咗殘局後,花前、月下同悲心使到海邊埗頭捉蝦摸蟹,余樞基同江諾山釣得大魚而回,十個人加客棧老板,一齊動手搞咗個海鮮餐。唯獨是無艶姑娘、人家吃得開心時,佢要啃乾糧,佢亦唔想俾人地睇見佢〝豐厚〞咗嘅口唇,佢點都唔肯同大家一齊進食。大家見無艶姑娘唔開心,各人都簡於言笑,吃罷、廚餘碗碟由老板清洗,便各自休息。




常福鎮近海邊不遠處,一匹〝四碲踏雪〞黑烈馬栓在樹旁,黑衣人抱着兵器卧在火堆旁!似是休息、似是監視、似是保護、似是放哨。



無艶姑娘在寢久久不能入夢,佢坐起床來穿上鞋子,出客棧外走走。回想呢幾日嘅事,覺得好無常,幾日前仲可以同眾女開開心心,短短日多就經過幾乎係生離死別,再想想自己當毒彈爆炸時,双手本能咁遮眼掩鼻,保唔住個咀。真係好擔心呢孖〝豬膶腸〞日後會變成點?佢亦記得曾被人抱懷中,曾有人為佢餵食同為佢受傷而哭泣,抬頭望着明月,輕嘆了一聲,佢彷忽聽到一片長空也輕嘆了一聲!




行近海邊淺水處,一輪明月反照出水上自己面龐;倒影少女頭包一條長絲巾,眉黛彎如鈎月,美目盼兮,巧笑倩兮,貌非美極,就是清雅照人。無艶姑娘顧影自憐,脫下面紗見嘴唇膨脹到幾乎滴血的「孖潤腸,名副其實的〝櫻唇欲滴〞,連佢自己對水中倒影,都笑到雙肩聳動「標」眼水!此時海邊傳嚟〝咭〞的一聲!有人在偷窺!




無艶將面紗掛上,喝一聲:「大胆狂徒,偷看本姑娘!」 拔出腰間〝雷霆掃穴棒〞直撲聲來之處!菊姑娘此聲一出,驚動和衣而睡嘅各人,紛紛飛撲而來。見菊無艶在水中〝檢〞起一人。這人也可奇怪;身纒幾個羊肚氣囊,用來浮水渡海,另一個羊肚囊,用作防水盛貯衣物……而佢俾週身纏嘅羊肚囊、繩繩索索同海草海藻、雜物撓埋一堆,載浮載沉,飲咗唔少海水,整個人水淋淋咁狼狽不堪。



註:「 咦!古時都有偷渡客?百厭星話有就有啦!」



大家見佢東洋打扮,諗今次真係雞同鴨講嘞!女俠中走出東瀛花子,佢行埋呢個東洋偷渡客面前,用東洋話問:「你是何人……」跟住双方嘰呢咕嚕講咗一陣。佢地講緊嘅時候,眾女俠打量吓呢個東洋漢子;眼神深邃卻帶孩子氣;鼻樑筆挺而無骨〝杉杉〞好眼好鼻好骨架,難得帥樣隱隱散發書卷味,風度翩翩有別一般略欠大度嘅東洋人!不笑時,冷俊憂鬱;笑時,燦然如陽光…… 眾男俠打量吓呢個東洋漢子;論論盡盡揹住五六個袋袋,成身濕到成隻落水烏鴉,講緊野眼神左瞄右望,唔講野時個樣哭笑難分,又唔係好高,得個六尺掙寸半,污糟邋遢滿脚泥!最緊要嘅係:除咗花子姑娘外,個個都唔知佢喼乜。




原來呢位東洋哥哥係以前東洋望族「福佳家」嘅後人,佢先祖就即係以前喺常福鎮後面福山,留低撥墨〝福佳石刻〞嘅東洋人。福佳係個姓,疍治係佢個名。今次係佢父親福佳正一聽聞中土開始揭開百幾年前〝福佳石刻〞同〝朋友秘笈〞之間嘅不解迷,吩咐佢潛入中土打聽。好心啦,係都揾個識講中土話嚟吖!




大家對福佳疍治都有疑惑,咁講真…… 佢〝眼神深邃卻帶孩子氣〞係幾惹人好感嘅,大家就帶佢番去客棧繼續「盤問」。無艶姑娘俾呢件疍治見到佢嗰〝孖潤腸〞同埋仲俾呢個福佳先生〝咭〞一聲笑添,佢真係好唔開心,繼續坐喺海邊。呢個時候,〝四碲踏雪〞馬嘶一聲,聞聲馬已到,黑衣人勒住人立嘅黑烈馬,牽着無艶姑娘嘅赤棕馬,說:「無艶,上馬,我們去跑跑!」無艶望着黑衣人,說:「是你!」黑衣人答曰:「是我!」两人两馬在草灌木林間奔馳追逐。


第二天早上,福山那邊風火四起,看來越燒越烈……




張貼留言