2014年5月2日 星期五

絕代双嬌 9- 10



絕代双嬌 9
文章日期:07/08/2012 08:40 am





絕代双嬌「吔烏城」冰火對决
第九回 無艶狹路遇莫愁 芃女尋謎闖東瀛


上回講到無艶姑娘與悲心使及小師妹正準備動程往東沿之際,葉捕頭還復女兒身加入旅程。

行走江湖方便,四女均作男兒打扮;葉捕頭、無艶姑娘同悲心使經常易釵而行,當然冇問題啦,唯獨是小師妹妍瓦姑娘就係第一次易男服,又害羞又有趣。四人騎五馬……五匹馬?當然啦!第五隻馬唔係要嚟做後備,而係要嚟揹四位女俠一包二包嘅行装。正準備出發之時,「廚癡」又嚟送食物送點心,驚死餓壞呢班英雌……擾擾攘攘又搞咗一輪,無艶姑娘正想揮鞭輕策棕黑坐騎出發,忽聞遠處芃澎悅耳之聲:「菊妹請等等!」



遠處見四女共乘一双馬拖車,芃澎正坐駕馭,花子姑娘在側,花前月下坐在馬車之內,車內裝滿大包細包嘅行装。四女邊行邊吱吱喳喳談笑,熱鬧非常。芃澎見師傅雲尼在、吐吐舌頭叫三女止聲,各女俠下車見過嚟送行嘅前輩,上前問安。五大姐又撲入廚內為女俠們準備糕點。本嚟上咗馬嘅無艶等女俠,離鞍落馬又同剛嚟到嘅四女俠八掛埋一份,加埋江南四秀,一個火鳳凰,仲有個廚癡添,真係一個墟囉!卒之擾攘咗成個幾時辰,上馬嘅上馬,上車嘅上車,大家打算一齊先出發到東沿「常福」小鎮方分道揚鏢,中途可以「互相照應」,實行有〝盤〞八掛一番。



羣雄睇住五馬一車朝北離開素心齋,走上往東沿官道;雨中淋望望洪湟大俠,做咗一個會心微笑,大家不約而同聳聳肩說:「女人喎!」在旁嘅五大姐搶白說:「女人乜野?」西域雲尼笑着說:「不可說、不可說!」一憂大師在旁合十曰:「說不得、說不得!」



正此時一匹漆黑駿馬撓小路,不經素心齋飛騰直奔東沿。眾人皆見過此馬上策騎者身影,但一時間說不出是誰。送行者除雨中淋大俠離中土返西域外,均約定两個月後初一日,再嚟素心齋等芃菊歸來,睇嚟两月後素心齋又有一番熱鬧!




嗰班女俠路上繼續八掛,呢度就唔講嘞;依家講嘅係東沿臨海一個叫「常福」小鎮,呢個小鎮喺戰略上係兵家必爭之地,因為佢地處與東灜只一海之隔,一箭之距。從商業販者絡繹不絕,本來係一塊繁榮之地。但近幾年嚟,行經商旅者多,落腳居棧者少。甚至有商販寧願捨「常福」,情願遠啲到別處渡海往東瀛。



即使係呢度嘅鎮府知府大老爺與眾巡捕都唔敢留喺「常福」,因為幾年前呢度嚟咗個形象長相醜惡嘅惡醜婦人……「鬼見愁」汝莫愁!此惡婦善用毒物,身上經常藏四十九枚〝黄蜂尾後針〞,此等針係喂有劇毒嘅暗器,中毒者行不出七七四十九步。佢初嚟步到就假意以白銀五百両承接常福唯一嘅客棧〝吳係好棧〞,(客棧主人姓吳名係好,佢間客棧咪叫〝吳係好棧〞囉),吳老伯年紀老邁,見有人肯出錢打理同經營客棧,何樂而不為;點知呢個惡婦,唔單止冇俾五百両白銀,仲霸咗佢間客棧,兼且招埋一班三山五嶽嘅打手喺度住。老人去告官,連個官都俾啲惡人打埋,卒之要執埋包袱同啲巡捕漏夜走佬。




鬼見愁手下有一強悍女將叫「雪山妖狐」令狐雪,此女來自北境,双眼藍瞳,冷若寒冰,不言不笑,出手狠辣,善用一對精鋼白狐爪,爪尖醮毒,被抓中者不死也必癈,佢手下訓練有一羣北境侍婢,個個武功雖不太强,但若九個婢子聯結「妖狐陣法」,功力甚強,入陣容易出陣難!



江湖流言好快就傳到「常福」呢個小鎮,話武林秘笈嘅發源地原來就喺「常福」,又話「常福山」上嗰塊「福佳石刻」同秘笈有關,連嗰條九曲十三彎嘅「福水」都有可能有料到云云!跟住啲邪派高手就開始蠢蠢欲動,臭味相投,集結「常福」呢块彈丸之地。



好嘞!下一回就等呢班「女人喎!」打餐飽嘞!所謂福無重至、禍不單行。今夕百厭星屠筆在手……咭咭!





絕代双嬌 10
文章日期:07/09/2012 05:58 pm





絕代双嬌「吔烏城」冰火對
第十回 八女俠溺陷困境 禍來絕處遇前仇


剛介紹「常福」呢個小鎮嘅大概,呢一行八個女俠日夜兼程,除咗食飯同晚間埋棧之外,三日旅程眞係辛苦不堪;起先两日大家仲有講有笑,吱吱喳喳,到第三日,要講嘅都講晒,要笑嘅都笑到個咀都梗埋嘞,開始納悶。喺路上除咗單調嘅馬碲踏石、車輪承軸發出吱吱嘅磨擦嘅聲韾外,大家都悶到一言不發了。八位女俠坐厭咗車換馬嚟騎,騎馬嘅騎攰咗,索性倒喺馬車上瞓個晏覺,總之就係「搞搞新意思」打發時間。



喺「常福」鎮,官衙嘅知府同兵丁巡捕都走晒,平民老百姓更加走夾唔抖啦。成個鎮留低嘅都係三山五嶽嘅壞人,佢地喺度等嘅,就係尋找秘笈之謎嘅八個女俠。「鬼見愁」經己放出探子,不斷回報女俠等嘅行踪。汝莫愁心想:唔知道女俠知道秘笈秘密有幾多,睇嚟要欲擒先縱,要先佈一個局,引眾女俠入瓮至迫佢地講出嚟。「鬼見愁」帶埋一班手下去到衙門前面,打响個鑼,召集晒全鎮嘅壞人開大會。



佢嘅計劃部署好之後,「鬼見愁」走入官衙,摷咗啲官袍兵服分派俾班馬仔,你扮兵兵、佢扮巡捕,乜水乜水扮小販、邊個邊個做店小二,金鋪老板緊係叫個大肥佬扮啦!總之要個鎮好似乜事都冇發生過一樣,一片昇平景象。呢個醜惡婦人著起官袍做其知府大老爺指揮一切,「雪山妖狐」當然係帶刀侍衛。兩個時辰之後,探子回報,眾女俠經已離鎮五里。「鬼見愁」突然想起,即刻衝入官衙大牢,提出〝吳係好棧〞嘅吳老伯,俾咗杯毒茶佢飲、話如果要解藥就好好地番去客棧做掌櫃,招呼八個女客官。當佢拉吳老伯出嚟嘅時候,大牢內仍然囚禁住另外一人,佢傷痕累累,倒在地上,口吐白沬,佢係邊個,稍後再說。



八女俠雖然有馬有車代步,路途遙遠、疲憊不堪,見鎮內有客棧,馬上投宿休息。「鬼見愁」左湊右湊揾到幾個會烹會煮嘅做廚房,勉強應付咗八女俠一頓晚餐,四女、「四男」膳後各自回房。夜深了,八女中只有两人沒睡;芃澎和葉依秋!葉捕頭行走江湖多年,閱歴甚深。芃澎雖不及捕頭,但行事謹慎,沉着穩重。佢地两個同樣諗两個問題:「點解呢個鎮只有壯漢而冇老弱婦孺?」「點解近東瀛一箭之遙經商之地,無其他商旅,入住客棧嘅除八女外,都係帶刀劍嘅粗漢子。」



這時,忽然人聲嘈吵!幾顆烟彈分別投入房間之內,房內毒烟迷漫,伸手不見五指,一顆飛來無艶姑娘面前爆炸,無艶双手一擋,保住了面容但吸入太多毒霧昏死過去。葉依秋與芃澎經已嚟不及救眾女,破窗而出,見黑壓壓嘅一大班持刀劍漢子重重圍困客棧,而客棧內其他「住客」裏應外合。「花前」「月下」「悲心使」「花子姑娘」「小師妹」相繼持劍衝出,一時間刀光劍影,七女力戰群奸!花前月下使双短刀迎惡敵、悲心使一葉快刀斬強悍、花子持着東洋長短刀拼命使出辛月刀法、小師妹傲然劍出鞘舞得花飛葉舞、盡管芃澎使出「妙韻冰音」眼意聲從心打倒一片又一片奸徒,打得蠻橫者手斷脚折。葉捕頭使盡判官筆點打撥刺招數,殺退不少强頑,奸徒還是一浪一浪湧上嚟!




一匹漆黑烈馬踢開擋路嘅奸徒,直奔客房,騎上人一身黑衣打扮,一手抄起被毒霧昏倒地上嘅菊無艶,好一匹「四蹄踏雪」黑馬,長嘶一聲躍出客房,擋其路者被撞個頭破血流。黑衣人勒着烈馬,回頭向正血戰羣奸嘅眾女俠叫道,「您們快跑、不宜久留!」。芃澎眼見花前等五女越打越遲純乏力,知佢等也中毒矣!芃澎激動悲憤地回應:「不!我可不能掉下她們,不能夠!」



話剛下,一把陰陽怪氣之聲笑曰:「走!那這容易,〝雪狐〞把她們拿下!」言者乃「鬼見愁」汝莫愁是也,剛才佢試着咗知府大老爺件官袍,竟然唔捨得除番落嚟,佢話:「我嘅然係鬼見愁,咪即係鍾馗囉,鐘馗着官袍嘅嘛。」佢仲戴埋頂烏沙添,佢個樣仲醜個鍾馗。〝雪仙妖狐〞一身素白衣,持一對白狐抓帶眾女婢撲入戰圈。




鬼見愁喝道:「雪狐,小心用毒,要留活口。」「你地班粗魯漢子全部給我滚開,人家係女兒家,由我地女的對付好了!滚!」鬼見愁一喝,眾漢子雖垂涎女色,攝於鬼見愁用毒狠辣,不得不停手退下。此時,「花前」「月下」「悲心使」「花子姑娘」及「小師妹」因在房間內曾吸入毒氣,紛紛倒下昏迷,由雪狐眾婢女架去。



黑衣人再急,放菊無艶在鞍前,口哨一聲,栓在客棧馬房,無艶姑娘嘅棕黑馬狂嘶躍起,踢破圍欄,其餘四馬亦跟其後衝入戰圈,見人就踢。黑衣人叫曰:「上馬、逃!」葉捕頭與芃澎飛身上馬,六駿逃離。芃澎在鞍上、馬狂奔,猛回頭看着幾位姊妹正被雪狐婢子捉去,淚流滿面,另馬狂奔在旁嘅葉捕頭亦難受得不得了。



馬跑咗差不多一個時辰,終於停落嚟,芃澎仍想撥馬回去救眾女,葉依秋一手掀住芃澎坐騎,芃激動的說:「我不能掉下她們!不能啊!」葉依秋忍着眼淚對芃澎說:「要忍耐!別急!要留住有生力量!」冷靜下來,滿面淚痕嘅芃澎只能應了一聲:「葉姐姐!」便嗚咽不已!黑烈馬趨前將鞍上菊無艶交葉捕頭,黑衣人面蒙黑紗,加上夜色昏暗,看不清是誰是男是女。黑衣人說:「我有要事先走!珍重。」馬頭一撥,狂奔而去。




曠野間,天上繁星閃爍、大地萬籟俱寂,宇宙間就好像只剩下葉芃菊三人!


那麽!被囚禁喺常福衙門大牢,負傷漢子是誰?他就是昨日之仇「瞧余奸毒」余樞基。


張貼留言