絕代双嬌 4

「絕代」一文寫於2012年仲夏，係根據2011年百厭回港省親，順道與幾位網友見面，一時興起將之作為題材改編，其中不乏真寫材料，如雨中淋到嶼南尋菊主芳踪，想破解當時網友心目中、這位能文善畫嘅菊主究竟是男是女、是老是幼和是美是醜之迷；接着約好咗彭彭網友、這位文靜而帶剛氣，聲線甜美勝越電台DJ嘅商界女强人與菊主一起「素心齋」用午膳，會面時百厭給兩妮子送上玫瑰花，使兩位女士先吃一大驚，而其後開心、煩惱到不得了，一幕是真確的。兩位女士雖然同住在香港，但百厭却做就咗佢兩位嘅第一次見面，兩女會面時對話雋永有趣，百厭以此作為對白，寫在「絕代」一文之中。

絕代双嬌 4

文章日期：06/17/2012 08:47 am

五大姐一聽見話第四回有佢演出，就即刻咁講：「下回到我出場，等我預備吓，摷番件戰衣，披甲粉墨登場先！」

我即刻同佢話：「五大姐太開心嘞，亞嬸，唔駛搽咁多粉架……乜厨癡（師）都有戰衣嘅咩？我以為剩係得頂高帽同條圍裙添！五大姐唔同，佢係兼職厨師、全職厨癡，两邊都有番两度散手……好嘢！」

五大姐再說：「可能我都係個武林高手，為了練武功做厨癡，練了痴心情長刀，斬瓜切菜用，又練了素心劍法，偷偷去行俠未定，死啦！我真係黐咗線，癲埋一份！」

跟住，甜夢話：「好嘢, 終於出場喇, 仲係夢仙添，YEAH~ 佢識唔識幫人解夢架？ 突然間好緊張添, 咁, 要唔要試鏡架？乜嘢造型嘅呢？對白自己度得嘛？越說越離譜添…… 」

連好少出聲嘅BoBo都講：「我做了新晉女俠。」

最離稿嘅嗰個村姑話：「無艷至少要與乾爹同場演出啊! 」

睇嚟，呢個吔烏故事真係搞到大家如癡如醉，大家都好投入，大家都好心急……

絕代双嬌「吔烏城」冰火對决

第四回 冰音嶼火初對决 素心齋樓會厨癡

「一壺東江水」「招呼十六方」左右一幅簡單對聯，上面蒼勁有力嘅三個大字「素心齋」。店主人「厨獃」五大爺十多年經營呢一間草棚模樣嘅普通食店，獨處山間幽暗之處。「厨獃」除咗厨藝了得之外，係武術白痴。不過佢嘅賢內助「厨癡」五大姐就同佢恰恰相反。大姐本係戲班出身，有不得了嘅武術基礎，話說幾十年前遇見仲係風流瀟灑嘅大爺，跟住就愛到發火，一跟就幾十年。自從大爺夫婦倆落户吔烏城，男「煑」內、女主外，好不合拍。大姐趁帮厨斬瓜切菜時練得一套「癡鬼咗線」刀法，只見神刀亂舞，瓜菜絮飛，片片厚薄大小均等，好功夫！佢仲喺煮齋做素時創咗一套「素心」劍法。大姐練武，右手持素心長劍，左手拿刴菜板刀，所謂一寸長强一寸、一寸短險一寸，劍刀互相配合不絕，水潑不進，氣透不過。年紀大咗啲，大姐突然發其妙想，想將大爺嘅厨藝練成武藝，點知一鑽研就將武藝溶咗入厨藝裹面，推陳出新，越煮越過癮，喺吔烏城做咗首屈一指嘅名厨「厨癡」。致於武功，大姐話都唔知幾時會出手，懶得理佢喎！

「厨獃」「厨癡」今日打開店門，經已睇見大班吔烏城奇人異士喺門前等候，正係納悶；點解會咁特別，午時未到就咁多人，平時未時先至有客人小貓三两隻。店門一開，「各路英雄」一湧而入，就似西遊記，猴王帶眾猴兵猴將入水簾洞，搶枱奪櫈，爭佔有利位置。頓時素心齋冠蓋雲集，人聲鼎沸，呼茶要水之聲此起彼伏。

遲來者、「爭」不到位嘅有两位，佢地不論高矮肥瘦，衣服穿戴都一個模樣，兼且戴住同樣嘅「黑超」，佢地係孖生兄弟；手持幡旗寫住「鬼卜」，係亞哥紀思磬，另一個亦係手執幡旗上面寫有「神算」，係細佬紀爾雅。改得好好嘅名字，不過有樣佢地冇咁好就係視力較差，所以爭枱櫈就輸俾人地。思磬對爾雅話：「我今早卜算過，今日我兄弟两註定會罸企。」爾雅對思磬講：「我今早求得下下簽，話今日會俾人打鑊甘嘅！」思磬話：「咁我地仲嚟？」爾雅答：「唔嚟？我地冇錢交房租，仲留客棧就真係俾人打鑊甘嘞！」两人〝唉〞一聲長嘆跟住踎埋一二角……

突而其來咁多客人，伍大姐當然忙到乜都唔認得啦，潛伏佢身內的武功內力就馬上顯現出嚟；「台上一秒鐘、台下十年功」，要茶有茶，要水有水，一切停當貼服。當大家仍係喺度么喝茶水小點時，店前嚟咗五匹駿馬，嚟咗六個人、三男三女，不！應該係一男五女。點解？雨中淋喺星星埗頭會上咗芃澎同菊無艶。芃澎帶上两個近身侍婢「花前」木蘭姑娘和「月下」月兒姑娘。三妮子雖然主僕關係，但情同姊妹。菊無艶同行佢嘅金蘭之交「悲心使」天使姑娘。

講起嚟呢五個小妮子之間又有段古；妙韻同嶼火嘅師父；一憂同雲尼，一個係佛門僧人、一位是教會尼士，難得惺惺相惜，咁佢地嘅徒弟當然情同姊妹啦。剛巧「花前」木蘭姑娘係菊無艶同村同里，所以芃菊好多時都由木蘭姑娘帶口訊。木蘭每次返嶼火島都會同菊無艶、天使姑娘一齊女扮男裝〝易釵懲奸〞劫富濟貧， 加上「中原一點窮」窮瘋婁帮助，島內惡人聞之喪胆。不明底蘊嘅「揪飛一葉」葉依秋捕頭恨得牙癢癢，想：「喺我地頭還有如此飛賊橫行，佢地真係〝矛廁裏面摷野〞找〝C〞！」咪帶两個「便衣警察」去嶼火島想捉拿菊無艶。

點解又明明係一男五女，又會係三男三女呢？唔駛講都知菊無艶同天使姑娘易男服到來啦。五位姑娘栓好馬，施施然企喺素心齋前等雨大俠。本來識大體懂禮儀嘅芃澎要讓自己坐騎給雨中淋，雨大俠堅持不要，說：「人與人可以做朋友，人與動物也可以是朋友，馬是我的朋友，我可不騎之！」。馬當然比人快，雨中淋沿山徑登山，在山間順手摘两株玫瑰。

菊芃雖然藉木蘭通訊，但两年多始終未有機會見面，這回係第一次有緣相見，當然五女〝一個墟〞講個不停。言語間雨中淋聽得芃澎……聲似銀铃又似翠玉輕擊，說：「無艶妹子，您真係同我身形好似喎！」言者無心，聽者却着意，無艶笑了笑說：「非也，姐姐比我想像中嬌少多一點，您骨感好多！」言剛落下兩女見雨大俠步至，芃女俠與菊無艶一步步走到大俠面前行禮，雨中淋突然從身後攞出兩支玫瑰花送俾佢地。芃澎笑說「吓！有花收呀? 我有好多年冇收花喇！多謝晒！……」两女俠仗劍江湖多年，好耐冇收過花，感到既驚喜又尷尬，男装打扮嘅男仔頭菊無艶都唔知想塞個頭去邊，而芃女俠諗：「好驚拎住枝花通街走！」

眾人步入素心齋，「各路英雄」仍然係喧嘩嘈閉，根本冇人理會。六人身後傳爽朗笑聲，笑聲响但不刺耳，遍每個角落壓全塲音聲。無艶即轉身叫曰：「乾爹！」再作一個女兒家嘅揖禮，全場目瞪口呆，好一個男子漢竟然行女兒家揖禮，無艶姑娘也紅都面晒……是面泛紅霞。「乖女兒！您今日約爹出嚟係會一會雨中淋雨大俠，我想這位正是……」「城主，在下正是雨中淋，非大俠也！」

「各路英雄」見城主到，均鴉雀無聲，讓出中間一席讓城主等坐下。本來靜落嚟嘅素心齋，突然有人嘩的一聲，跟住其他人亦好似俾人點咗「嘩」穴，大家都不其然「嘩」聲起嚟。席中嘅洪、雨大俠隨聲望去，見門前嚟咗四位女俠，「各路英雄」見眾女之美驚為天人。「晚輩代師向各前輩請安！」四女拱手為禮，全塲只有洪湟和雨中淋起立回禮，洪湟說：「『四秀』一齊到嚟，真好，你們師父好嗎？」「四秀」係「江南子」文折桂嘅高徒〝夢、影、劍、羽〞；夢是虛幻「夢中仙」如夢姑娘、影是幻中有實「雲端影」步輕雲、劍是重「南疆青劍」娜拉、羽是輕「塞外箭羽」瑪姬。「四秀」唱個諾說：「師父好，他老正趕着來此，徒兒等先來哨個訊。」四秀站在席旁，不敢在前輩前妄自坐下，此舉使坐在中席的五女亦紛紛站立。

雨中淋解下背後包袱放在席中，正想說話，只有高手才能聽到很輕〝嗡〞的一聲，一絲銀光一閃，席中包袱即向樑上飛起。眾人眼望樑間有一少年，手持漁杆，揮杆中漁線將包袱搶去。此小子當然係胆大包天啦，此地高手雲集，連當年嘅「落雨劏雞客」都唔敢妄然落手嘅塲面，佢竟然出手強搶。當大家仲係驚訝嘅時候，「妙韻冰音」朝飛舞搖擺嘅漁線瞪一眼，嬌哦一聲「斷」，漁線斷掉包袱即墮，好個「雲端影」步輕雲，足尖一蹬飛出两丈，伸手一抄把包袱接住，順勢向少年撲去，「南彊青劍」娜拉拔劍在手一彈而出發出青脆「嘯」的一聲，在另側斷少年去路。

「勿傷我徒兒！」席間两人齊聲呼喝……

此兩人係「天下極貪」真特醜嘅手下「瞧余奸毒」余樞基、「了斷無痕」寒春日。少年係佢地两人同收嘅「徒弟仔」江諾山……

後事如何、下回再說！

補充

終於舒一口氣，接落嚟又要繼續組織故事往下嘅發展。

呢一回同两位博友定吔烏名同臨時加入咗幾位客串主角，由收到名字、諗爆頭改名到出稿只係幾日。將本來既定嘅橋段更改更改再更改，最攞命係為各位冠名，又要有意思，又要同博友原來嘅博名近音，仲要配合故事劇情需要。真係多得無艶姐姐唔少！

今回出現嘅，喺以前冇提及過嘅有：「江南子」文折桂大俠（江南第一才子）、「厨獃」五大爺（情相伍大姐個大爺加入）、「鬼卜」紀思磬（K師兄）、「神算」紀爾雅（kei）、「花前」木蘭（花木蘭）、「月下」月兒姑娘（月兒）、「悲心使」天使姑娘（天使心），「徒弟仔」江諾山（降落傘）。

下两回係全部出塲，賓虛咁嘅塲面；再加有「小師妹」妍瓦姑娘（Katharine）、「口花太歲」瓜啦啦（口花花）、「天涯俠醫」安道全（安道全）、「木公生」步如騛（人生馬拉松）、「無喜怒」吳瘋（HERO）。

仲有三位網友要無艶姑娘去接洽磋商嘅：「四腳蛇」嚴卸（四隻腳嘅蛇）、「華三少」華季曜（五星下的三星）、「火鳳凰」言自語（火鳳凰自言自語）。


好嘞！瞓番個好嘅！早抖！