2014年4月18日星期五

絕代双嬌 3


絕代双嬌 3
文章日期:06/10/2012 06:34 pm

網友〝中原一點窮〞話:「嘿嘿……以老夫之武功睇嚟都冇乜角色啱噃……唉…… 
唔駛嘆氣!既然係嚟到,即刻俾你〝攝〞位;就用番你個名「中原一點窮」窮瘋婁!除咗加入「窮瘋婁」呢號人物外,您地有冇發覺,嚟到呢度,都係忠肝義胆既英雄豪傑,個個都係「忠」嘅,咁「奸」嘅呢?冇奸人好似唔成故事喎,所以雨中淋情相邀請咗「天下極貪」真特醜,加入呢個吔烏故事,遲啲佢就會出塲。






絕代双嬌「吔烏城」冰火對决

第三回 芃女俠遵從師命 菊無艶樸朔迷離

十多年前,西域雲尼途經吔烏城,一個女孩子嘅歌聲使佢放低佢多年嘅流放傳道。小妮子嗓子字正腔圓,音聲响亮拍子準確。雲尼就住喺吔烏十多年,將自己悟出嘅一套「妙韻冰音」心法,悉數傳俾芃澎。心法說「眼從心、意從心、聲從心。」芃澎練得收放自如;五丈之內眼望屋頂琉璃瓦,意從心,聲從口「碎」的一聲,瓦即粉碎、對磚磚裂、對樹樹破。柔韻則如手輕拂掃,冰音即如五雷轟頂。天資聰穎嘅芃澎,不但從雲尼處學懂上乘武功同醫術用藥,雲尼亦將自己終生信仰影响芃澎,所以女俠持「大愛」心,經常潛入城中大牢為囚徒治病。



西域雲尼悟嘅係「心法」,授芃澎嘅亦係心法,所以两師徒心意相通,一個眼神經已能心領神會。當日信鴿硬着陸,芃女俠得到師父信件,打開一看……信內白紙一張,全無片文隻字。芃女俠會心一笑,懂了!數日前,佢自商旅帶嚟師父口訊,大概知道雨中淋還書嘅事,今日收到雲尼飛鴿傳書,白紙係喻意:「一切在未知之數(空白)、隨機應變(機未現暫毋需變,故也是空白)」



回頭講嶼火島……雨中淋沙丘遇到東瀛十二郎及花子姑娘,十二郎本來想到中土見識中國武術,其妹花子姑娘見十二郎遲遲未返東洋,所以嚟中土尋兄,跟住兄妹倆就到處流浪,後嚟知道吔烏城多奇人異士,就南下吔烏。佢两兄妹一剛一柔,不少吔烏異人都敗喺佢地手上。贏得多就不免囂張起嚟。



十二郎見雨中淋儒生打份,羽扇綸巾,經沙丘留脚印痕跡,雖然覺得對方氣宇非凡,但係個心想此人〝好打有限〞。花子姑娘有亞哥做胆,十二郎做乜佢就跟住做乜。當兄妹倆與雨中淋擦身而過嘅時候,十二郎故意碰撞雨中淋,雨大俠何等機靈,扮得好笨拙咁避開,口中仲喃喃自語「小心小心」。十二郎近日全無敵手,所向披靡,呢一招竟然俾呢個寒酸書生避過,點可能!即破口罵道:「八格也路!」花子姑娘比佢亞哥温文得多,心想:亞哥四處向人家挑釁,始終有日遇到強手。話口未完十二郎經已同雨中淋過咗十幾招,招招都俾雨中淋跌跌撞撞論論盡盡咁化解咗,氣得十二郎「八格、八格」咁叫,最後佢用唔咸唔淡嘅中土話同雨中淋講:「我同你打賭,你俾我進十二招,如果你能夠避得過,我叩十二個响頭俾你,如果你避唔倒,你要賠我十二個銅錢,請我食十二餐,每餐要有十二個餸菜……」十二呢樣十二嗰樣,雨中淋聽到心中好笑。



說時遲那時快,十二郎就好似部「人肉鏟泥機」咁鏟埋嚟,花子姑娘防佢亞哥有失,亦聯手進攻。呢部二三百斤嘅「人肉鏟泥機」好似隻狂牛橫衝直撞,花子姑娘則如花中彩蝶,一剛一柔圍住雨大俠出招。點止十二招,十二個十二招都打完,兄妹倆連大俠衣邊都未沾得着。雨中淋故意賣一個破綻,十二郎双手如摔交手咁提起雨中淋,大笑準備跟着往空摔出!花子姑娘眼看亦心中明白,連忙搶上護住十二郎,一招「巧手拈花」進襲雨中淋面龎。雨大俠面上如蚊剌一下,心中說:「不妙」,一根長鬚被花子姑娘拔去。雨中淋脚尖輕踢十二郎,飛彈而出,此時花子姑娘急叫「哥」的一聲,見十二郎傻笑站着,上身朿衣腰帶經已落喺雨中淋手上,片片碎絮。大俠喺俾佢「捉住」時用極快招數打斷十二郎腰帶而冇擊傷其身。花子姑娘將手中長鬚去掉,除咗佢地兩人外,無人知大俠虎鬚被花子姑娘拔了一根。好個十二郎,佢正想下跪叩頭,雨大俠一箭步用手一托扶起、二三百斤嘅大漢說怎樣都跪唔落去,雨中淋微笑朝滿菊東蘺小屋而去。



企喺小屋前,唔見屋內有人,雨中淋想係來不逢時,正想轉身而去,見屋角有一乞丐蹲着。「請問,島主在家嗎?」雨中淋問,問時留意呢個乞兒雖然衣衫襤褸,成個「污糟版」嘅喜多郎咁,但皮光肉滑,看來並非破落之人。乞丐望也不望,低着頭不作聲。大俠說聲:「得罪了!」轉身回埗頭方面離去。



呢個破落乞兒係邊個?佢本係中原王孫公子,享不盡榮華富貴,為乜淪落於此無人所知,只知佢係「中原一點窮」窮瘋婁。佢最潦倒嘅時候係十幾日無半口粮落肚,又公子哥兒脾氣死都唔肯折腰行乞,當時佢想:「我中原一點窮怎會餓死之理!」過多幾日佢真係餓到就嚟死,佢想:「我中原一點窮竟然真的會餓死」。當佢餓得昏昏沉沉嘅時候,佢覺得有一啖一啖嘅熱粥吞入肚裹,佢花最大努力睜開眼,見一個美若天仙嘅少女,一匙羹一匙羹將熱粥送入佢口裹面。佢硬頸唔肯食……最低限度食都唔駛人餵,餓到死咁仲邊有力氣「反抗」,如是者,菊無艶救咗佢一命,佢知道欠菊無艶一條命,所以待機償還,搭咗個草棚喺山後面做咗菊無艶嘅「守護神」。幾年來互相照應,帮菊無艶行俠仗義同屢破奇案,雖然係咁,佢兩個從來冇講過一句話。「中原一點窮」養身修息練得「窮得好陰功」同「唔窮冇陰功」两門特異功夫。




雨中淋返回埗頭,踏上街渡,坐船尾閉目養神。聽見船頭有人輕吟:「大江東去,浪淘盡,千古風流人物……」雨大俠鏗鏘其音接道:「數風流人物,還看今朝。」

船首「揪飛一葉」葉依秋正與两〝便衣警察〞每人咬住碌蔗,捕頭看江水滔滔有感,吟咗两句蘇軾【赤壁懷古】。聞船尾有人和詞,回頭一看,見是廿年前曾追捕過嘅「落雨劏雞客」,葉捕頭知自己今時今日功力遠遜於對方,仲更湧出「故國神遊,多情應笑我,早生華髮。人生如夢,一尊還酹江月。」嘅感慨,妨且識英雄重英雄,立即放低手上碌蔗,與船尾雨中淋雨大俠拱手相對,微笑向對方說:「幸會幸會」,一笑泯恩仇!



此時船臨江中,岸邊奔來一匹棕黑駿馬,馳駒人英姿颯爽,黃衣黃布。隔江向雨中淋千里傳音:「雨大俠、後天午時太平島星星埗頭見,『冰音、嶼火』候教!」跟着少女的笑聲夾着馬嘶而去。



14 則留言:

Shu Siu (如心恕也) 說...

雨兄,我想等你出多幾集才一次過睇,唔使停停歇歇⋯⋯咁無癮!

人在雨中淋 說...

嘩!如心客,兩分鐘前先至上架,你咁快連回應都寫埋。
你知唔知呢集有幾多個字呀?成二千三百幾喎,如果幾集一齊上,六七千字,好少會有網友咁有耐性嚟睇,不過,百厭會每兩日上一次,咁好唔好呢?

Stella Luk 說...

咁我每兩日來一次囉!你要凖備好香茶美味咁喇!

人在雨中淋 說...

宗姊,食埋宵夜又點話唧....

Unknown 說...

到現在仍覺得所有角色名字都非常精妙! 讚!

Unknown 說...

雨大哥,娜拉回歸了!

人在雨中淋 說...

只要緣還在.....
妹子,不介意大哥給你一個熊抱嗎?

人在雨中淋 說...

要多謝菊主,佢俾咗好多很好意見、「步輕雲」這個名字就是她為你起的。

秋葉 說...

再看也很好笑!「十二呢樣十二嗰樣,十二郎好似人肉鏟泥機咁鏟埋嚟!」
寫得很生動傳神。十二月兄真係在寫博文時,說過十二乜,十二物的。

飛鳥 說...

雨兄
復活節快樂並祝身體健康

人在雨中淋 說...

十二月很風趣,喺「絕代」一文中被描畫得沒頭沒腦,其實佢好精靈能幹。不過佢唔係二三百磅嘅巨人,而係高佬一名.....咭咭,咁大整古...

人在雨中淋 說...

飛鳥到處飛,今次飛到老雨寒博!你好嗎?呢排有冇春日鳥嘅消息呢?
復活節快樂!

五味軒 說...

後來才得悉,是十二月兄名字中有個青字,十二月係青字。

人在雨中淋 說...

呢個世界真係好細,青十二同百厭講起監獄處,原來佢認識百厭喺赤柱自細玩大嘅朋友,經百厭介紹,佢兩個喺香港這彈丸之地,二三十年未見過而得以重逢會面.....