2014年7月26日 星期六

家常閒話



家常閒話

個電腦唔知做乜,無端端亂晒大坑,個滑鼠標可以當手寫板支筆寫字,上網Google Chrome又唔知為何多了十多個提示說,因為所用Chrome不足以開啓部份資料,要用較新版本,不過又冇任何指示如何更新..... 總知搞咗一個晚上,最終決定「鏟機」。需知道要鏟機,先要將所有檔存資料備份,否則,一「鏟」就一了百了,乜都冇晒。趁電腦還苟延殘喘,做得幾多得幾多,先將心中說話與各位說說家常閒話。



抵加多年,好少游泳,問題到海灘游水,海水來自北冰洋,温度頗冰冷﹔如果去泳池游泳,太多消毒劑喺水中,試過一次游完,眼前一片白濛濛,真得人驚,跟二十幾年就沒有下水之意。好嘞,最近大公子遷入嘅住所,有室內泳池、Jacuzzi等措施,老伴試過話幾好,極力推薦,老雨免為其難.... 好啦!應酬吓啦!



水怪史畢茲(Mark Spitz網上圖片

先說老雨游泳「歷史」; 水怪史畢茲(Mark Spitz一九六八年墨西哥城奥運摘七金前,老雨經己號稱「水怪」。老雨本來唔係咁識游泳,即使年幼經常出入有絕美海灘長洲及赤柱,多年都係腳到地爬爬爬狗仔式。直到一次跟一班警察哥哥(六個水警一個陸警)帶住做地獄式訓練,一日之間由石澳海灘開始,龜背灣、赤柱正灘、舂磡角,逐個海灘去捱浮台,從中前後左右俾「差人」挾住,話隻手要咁撥水,對腳要咁樣踢水,點樣手腳動作力點喺正中推行速度至會快,如何側面吸氣,手點樣入水減少阻力,手划兩下腳要踢多下..... 總知剩係飲水都不知有多少,最後戲肉是由南灣游水到淺水灣,一日之內「暢游」六個海灘,呢個地獄式訓練,培養咗小雨成為當年喺童輩中牙擦擦嘅「水怪」。




二十幾年沒有下水,咁最近落水又點呢?咭咭..... 先俾張小雨陳年泳照過你睇睇。


一九七八年 泰國布吉


當年高大威猛,手瓜起展,胸肌結實,六塊腹肌若隱若現。現時老態龍鍾,手有翼,胸肌鬆弛,六塊肌早已團結為腩肌,嗚呼!


最搞笑嘅係唔知點解,游極都唔多去,用盡當年地獄訓練所學,每一個動作細心推敲端詳都不得要領,眼見個徒弟仔(梗係老伴啦,仲有邊個吖?)游自由式仍然係咁暢順,不枉當然老雨盡心教導。落莫之餘,跳落Jacuzzi 泡熱水,才恍然大悟,原來是.....   泡熱水,用噴射出嚟嘅熱水沖擊身上穴位,有治療之効,老伴仲發明用之做腳底按摩,話對心肝脾肺腎都有好處喎。


泡完熱水即刻跳番落泳池「過冷河」,只見自己再唔係虎背熊腰,不過仍然水怪... 水中之怪模樣,身穿一條「孖烟通」泳褲,條褲寬鬆得在水中蕩來蕩去,論盡兼阻水,依家又冇當年小雨嘅身裁撐起有型泳裝。老了!老雨覺得自己經已不是當年嘅「浪裏白條」而現實的說是「水中白蚱」。




如果老雨老實你知...... 又驚又喜不過最好就唔好話:「關我乜事唧!」 經已計劃十月下旬和老伴回港一行,希望能逗留四星期,現在還在着意解決四星期嘅居住問題,瞓天橋底卦? 這些並不太重要,有人說﹕「凡事可以用錢解決嘅就不是問題。」 睇嚟要動用養老基金嘞。最重要回港想見到你、你和你.....



張貼留言