2014年1月17日星期五

孤高城‧雨中家(18)延年殿宴出奇謀 雨中家遭逢毒手





 網絡圖片


孤高城‧雨中家(18)延年殿宴出奇謀 雨中家遭逢毒手



王爺將兩金爵高舉過頭說:「皇帝細佬唔飲,大哥先飲係欺君,是死罪,但我唔先飲,皇帝又唔放心,那就將此兩杯先敬在天先帝與母后,大哥才飲吧!」敬酒既畢,左右各一杯,一飲而盡。王侯美用舌頭舔乾淨沾在咀角上嘅酒,從蟠龍台階一跳而下,站立在大殿中央,呼喝周邊宮娥侍婢:「你等奴才,還不為各人添酒。」這一喝,亂了宮廷內務總管宴會安排,大殿奴僕各人不知所措,擾攘一番後,宮娥等為各級官員添上寒冰暖。王爺再踏上蟠龍台階,將佢帶嚟那一瓶酒為皇帝皇后添上,然後舉杯在手說:「願我皇萬壽無疆!」殿內臣子均站立舉杯過頭三萬歲。王侯爺趁眾人舉杯時,又重施故技,用好快手法將一個錦盒放喺皇帝桌面上。思奇將軍等三人眼快都看得清楚,思奇與雨中淋望望珛櫻,她仍然將手往下按了按,睇嚟珛櫻要引蛇出洞。王侯爺眼也不慢,看見三人動靜,佢嘴角不屑的冷笑了一下,好似話:「你奈我何嗎?喺大殿上,你敢貿然穿本王做作嗎?」



皇帝好像怯於王侯爺嘅霸道,亦似乎唔能夠主宰呢個塲面,佢拿起桌上金爵很尷尬笑了笑,說:「好!各位愛卿,飲!」舉杯將一整金爵嘅酒往口倒進去。



王侯爺開心得喺台階上又笑又跳,朝殿內羣臣說:「皇帝經已飲了本王嘅酒,待後皇帝細佬可能有獎賞,頒報天下,各位先盡這一杯!」此刻喺延年殿中,連皇帝似乎都讓王侯爺七分,一臉憔悴,羣臣那敢怠慢,紛紛將手中寒冰暖一飲而盡。當美酒過咽入腹,各人心中均讚嘆不已:「好酒,好一杯寒冰暖美酒!」回到席間不禁倒滿一杯再盡。王侯爺那知道雨中淋釀酒時經已做了手脚,還開心到不得了,佢笑住對殿內婢僕說:「快上菜,上菜!」



酒過三巡,王侯爺先喝一口「解藥」,從首席步出大殿中央,望望蟠龍台階上嘅皇帝皇后,見佢兩人神情呆滯,心想時間到了。佢跳上台階執起剛才放下嘅錦盒,嘻皮笑臉的說:「真個是人逢喜事精神爽,皇帝細佬今日大壽,太開心了,所以佢頒下聖旨將王位禪讓給我,還請各大臣做個証。」佢做戲咁做,回頭向皇帝下拜說:「為兄不才,先皇立皇帝細佬為太子,現今細佬玩夠嘞將王位讓我,為兄那敢不受!」拜畢,由錦盒取出「聖旨」面向羣臣,將之高舉過頭說:「請各大臣見証,聖旨頒令天下!」打開聖旨朗讀:「聖旨下.... 」羣臣紛紛離席跪在殿前,王侯爺見一切如佈局順利進行,心中暗喜,繼續往下讀去:「奉天承運皇帝,詔曰..... 」語方下,殿內羣臣一個一個如骨牌的醉倒下去,事出突然,延年殿內宮娥婢僕衛士忙着上前攙扶;一下子幾十個一品高官將領,醉的醉、倒的倒,那裏有人聽王侯爺讀聖旨。王猴子愕了一愕才如夢方覺,腦後聽見那發了呆的皇帝哈哈的笑咗幾聲,皇帝也倒了,太監宮娥又忙着攙扶皇帝皇后,王猴子望住呢個「殘局」,正是一子錯滿盆皆落索。



王猴子當堂方寸大亂; 佢佈局係要用計將佢自己加咗迷藥嘅酒趁機俾皇帝飲,使皇帝混沌中毫無抗拒「禪位」,本來可以毒酒弒君,但知皇帝已立太子,皇帝死則太子登基,日後篡位會更複雜,所以佢強雨中家入局,釀一些含不太濃烈「醉三宵」嘅寒冰暖,使與宴眾大臣飲得似醉非醉,混混沌沌之際、無異議間,禪位便平安過渡,咁就如三十六着第八計「暗渡陳倉」。那知王爺呢局高明,却對手更高明,珛櫻用的也是三十六着其中之一、第二十二計「關門捉賊」。



延年殿中眾人醉得一塌糊塗,就因為珛櫻與雨中淋覺得奇怪,為何王猴子强逼雨中家釀有醉三宵嘅寒冰暖,而份量沒理由又出奇的「唔湯唔水」,破綻就在這裏。所以精於釀酒嘅雨中家點會失禮,將計就計釀出寒冰暖中極品,一杯到肚還可以,兩杯入腹就非醉倒不可。



此時王猴子見事情敗露,無心戀戰,佢將假聖旨藏在衣襟之內,心想:「此乃罪証,失去我命休矣。還有.... 那一個有迷藥嘅酒瓶.... 到皇帝、大臣等醉醒,可以話佢地酒後模糊,多少可以推得乾乾淨淨。」王猴子正想躍上蟠龍台階,只見像鐵塔般嘅思奇將軍比佢還快,經已酒瓶在手。王猴子奸笑一下,心想:「你拿着酒瓶又如何,那不是雨中家的瓶子嗎?」雨中淋好似知穿佢所想,一個專為賀壽酒瓶不偏不倚拋過嚟,正正落喺王爺前面,瓶上有「囍」印為記。王猴子知大勢已去,正欲轉身向殿外跑去,只聽得珛櫻嬌哦一聲:「留下假聖旨,可免你一死,你王爺府與我雨中家互不相干,今夕之事如無發生,王爺說如何?」王侯美答:「本王憑甚麽相信你?」珛櫻說:「就憑江湖一個﹝信﹞字!」「市井人說信,信得過嗎?」王爺答後加勁的往外跑,叫嚷着:「來人呀!捉刺客呀!」延年殿外站的都係內衛士,見內衛統領跟隨其後,那有人會聽王爺號令。此時間,珛櫻與雨中淋解下腿上鉛塊,輕輕的射向王猴子手腳,是給猴子一個警告,那知王侯爺心想:「本王乃皇帝親兄,你等刁民敢殺本王嗎?」話口未完,身上麻穴被暗器擊着一痛,整個人立定動彈不得,那件暗器竟然就是上次雨中夫婦夜闖王侯府,取去自已圍棋盆上一顆黑子。雨中淋步前在王猴子懷中取出假聖旨說:「王爺,得罪了,如果王爺守信,今夕之事如無發生,你王府與我雨中家互不相干。你這麻穴兩個時辰自然會解,望王爺好自為之。」雨中淋將假聖旨交了給珛櫻,然後對殿中婢僕解說眾等官員酒醉三天會醒,無需解酒之藥,皇帝皇后中迷藥要由太醫治理。



雨中淋與珛櫻離開皇宮,似乎是解去心頭大石,但仍然覺得有憂患隨來。珛櫻對雨中淋說:「相公,那猴子胸襟狹窄,喜怒無常,信不過,看來我們還是趕快回家收拾,連夜離開大都,逃到天涯海角另起家園爐灶。」未抵雨中府第經已見遠處火光紅紅,王猴子佈的局就係佢講嘅一句話「雨中淋,你唔替本王釀酒係死路一條,如果你依從本王亦係一條死路。」雨中夫婦輕功了得,一盞茶時間趕回雨中府第,大屋經已四周火頭,佈滿王侯府侍衛處處點火,雨中淋見況簡直瘋了,與珛櫻撲入火塲,雨中淋救出了晴兒,拿着金背鬼頭刀見敵便砍,殺出重圍,珛櫻撲入被火燒得快要塌下的房子救尋兒,媬姆護着釵兒,拿起身旁一張椅子,點的、擗的打下咗唔少賊人嘅胳膊,將釵兒交了給雨中淋便昏倒了。珛櫻救出尋兒拋了給釵兒接住..... 整座廂房被火吞噬倒塌.....



一個簡陋草棚,雨中淋將女兒們安置好,長嘆一聲,喚起了前塵往事,也想起妻子珛櫻,雨中淋隱約記得當廂房塌下那一剎那,翻起塵土,蓋滅了廂房的火焰冒出濃烟直沖雲端,似看見珛櫻身影隨白烟飛上天際幻滅了..... 想到此,雨中淋滿面淚痕,暗暗的呼喚珛櫻,回頭望熟睡的三個女兒,熱淚盈眶.....


33 則留言:

Stella Luk 說...

前塵往事不堪回首!

red yellow 說...

唉,
棋差一着,
應知點都死,
早擺空城計。

大概是看得武俠小說少,
行俠仗義之道不熟。
看《三國演義》或《水滸傳》也有同效呢。

Unknown 說...

前事開始大白。

Unknown 說...

呼應了開始的一幕。

Shu Siu (如心恕也) 說...

雨大俠,點解只掛住啲細而無理到個大嘅呢?
珛櫻,莫非又為"南海神尼"所救?嘻嘻!

Unknown 說...

珛櫻似乎並未死噃!

Unknown 說...

會繼續追看的!

五味軒 說...

好一枝回頭筆!伏線令故事更峰迴路轉!掌聲!

人在雨中淋 說...

如果唔寫番轉頭,看倌又那知何解雨中大俠如此落莫,雨導會俾人家r噓」住柴台。

人在雨中淋 說...

聰明人失敗嘅地方就係以為沒有人比自己更聰明,而善良人失敗嘅地方就係諗唔到別人更狠毒。此局兩者皆輸,王猴子仗勢欺人,兵多將眾,雨中家只憑夫婦兩人周旋,百密尚有一疏,寄望能將禍事擺平,主因係捨不了家業,人之常情.....也無奈。

人在雨中淋 說...

好嘞,前事說完,說後事....大吉利是!

人在雨中淋 說...

噓!諗到頭都脹埋至將個古仔接得番埋....好彩!

人在雨中淋 說...

大嘅有手有腳會走會跳,釵兒五歲,情兒三歲、尋兒得幾個月,唔掛住去救,點寫呀大佬?

人在雨中淋 說...

欲知後事如何,請看下回分解.....(好鬼行貨喎)

人在雨中淋 說...

紀大俠咁忙都嚟捧塲,多謝多謝!老雨常到你博,見太多人留回應,免你太繁忙,所以未留片語,請見諒!

人在雨中淋 說...

一招回馬槍幸好能將古仔接得番上,破綻同犯駁之處畧少,驚完!

Unknown 說...

行!😁

五味軒 說...

五姐估header中左手邊,二樓有好多窗嗰間係百厭屋企,啱吾啱呢!

人在雨中淋 說...

估錯咗咯!係右邊嗰間,有幾架車泊喺車道,可以睇見車房有架紅色本田跑車係孻仔雋藍嘅,前面銀灰色嗰架富豪係雨中夫婦出入代腳用,最前嗰架就係卓藍架本田,另外馬路邊泊嗰架桃紅色富豪係小姨架車,一家五口,四架車真誇張,不過係需要,因為呢度公營交通唔似香港咁發達,巴士喺非繁忙時間一小時一班,繁忙時間都要等半個鐘頭。屋前兩棵松樹係移民後兩孩子從童軍處帶返嚟兩棵呎許高嘅樹苗,二十幾年高過間屋,當然啦,兩小子都高過老雨矣。兩樹正在老兩房間窗前,現時用喺博客個背景圖象就係呢兩棵樹嘞。

Shu Siu (如心恕也) 說...

跟你講下笑啫,你唔咁寫仲有得講咩,嘻嘻!

五味軒 說...

記得以前在舊blog見過你架車係藍色,所以估錯隔離,咭咭........自作聰明添!

Unknown 說...

嗚....................如果寫亞MA為我而死............太罪過了, (我馱唔起呀!!!!!!!!!!)
應該未死的, 仲靚過舊屎(時).....KAKA
亞哥叫俊男, 咁....我叫美女啦,
你個架車,我坐過啦, 同款的我家親人有.

人在雨中淋 說...

你冇記錯,係架平治,不過唔係藍色係黑色,事緣係小姨架桃紅色嘅富豪就係上面個圖嗰架,就停喺屋前同一位置,俾一個醉酒司機成架撞到報銷,佢又唔識揾車,我就讓咗我架银色富豪俾佢,買咗架平治。

人在雨中淋 說...

大吉大利、百無禁忌!
個古仔都未完,你又點知呢?亞爹都未知點寫落去呀!
百爹架係2000年嘅老事,丟皮丟骨咯....

人在雨中淋 說...

咭咭!

Unknown 說...

我在上面亂講野....你唔會嬲我架呵 >.<// 衰左.......

人在雨中淋 說...

冇事喎!唔使擔心!亞爹咁小氣嘅咩.....唔係!係好鬼小氣就真,啍!

五味軒 說...

你兩父女真係百厭鬥百厭,虎父無犬女呀:))

五味軒 說...

係嘞,點解我搵極都搵吾到百厭妹嗰地步留言嘅?

人在雨中淋 說...

佢懶囉,暫時停筆,不過又唔抵得佢亞爹喺度也文也武,咪成日加把嘴埋嚟。

Unknown 說...

好采軒姐話虎父無犬女, 梗係 >.< 係馬騮女丫麻. 幾驚妳話青出於藍, 咭咭,
百厭亞爹個d百厭呢.....佢認第二冇人夠膽認第一. (~.~) ( 文無第二, 武無第一, 似文人比筆? 比武? )
我暫時真係無野寫. 唔想寫. 一來自幼家貧讀冇書, 生活平淡筆墨難書.( 可以寫成舒, 因為不能舒懷 )
連去睇人家寫乜都冇興趣. 心神不定, 心情麻麻. 易生口臭. 易得罪人, ( 得亞爹肚大可容忍我 )
匿埋咪幾好. 得閒來錫(亞爹)館. hehe...........

Unknown 說...

錯字. 踢館

人在雨中淋 說...

踢亞爹館!斗胆....今晚冇飯食!