唐人街亞伯

唐人街亞伯

二十多年前剛踏足温哥華，真係唔知點解，朋友一定會帶到唐人街飲茶，可能係介紹下本地華人嘅集中地，不過時移世易，依家唐人街經已冇以前咁具吸引力，因為華人聚居開始分散，以新城市生活方式嘅烈治文市，基本上取代咗日漸衰竭嘅唐人街，加上本身建築物殘舊，道路狹窄骯髒，冇大型購物商場，年青一輩不管係本土出生，或係跟隨父母長輩移民，大多唔願意到唐人街走走。二十幾年前同二十幾年後，唐人街仍然係個老樣子，今日有唔同嘅地方係，雨中先生拉住一架比較新款式手拉車，與二十幾年前老一輩華僑一樣，喺唐人街買蔬菜。老華僑知慳識儉，全世界都係一樣，特別係年長者收入短少，總想留個錢傍身，所以全城最集中最平，賣唐人菜地方，只有唐人街。

雨中先生呢次真係雨中淋，淋住雨水拖架車仔行唐人街買菜，買完番到架車，全身濕晒。架車仔最搶眼，當然係個冬瓜啦。

搬晒上車，點一點總共買咗七種瓜菜：椰菜、矮瓜、蘿蔔、冬瓜、青豆仔、番茄同白菜仔。你又估下一共花費幾多錢？

喺上面張相，你可以睇見番茄有幾大袋，講你都唔信係一蚊加元（今日滙率港弊六元一角）。大家都可能會覺得奇怪，或者會諗，啲番茄一定係爛嘅，落小小眼力睇睇...

洗淨切開，只有一個熟透破裂外，其他都好好，賣得咁平係因為呢個商號老闆幾十年嚟，每朝早四五點鐘就去菜欄，買啲近乎「喊欄」平貨，例如呢袋番茄，賣遲一兩日就會出水發霉，俾都冇人要，所以菜欄會好平賣俾老闆，佢執到平貨又係同樣理由益街坊。

因為唔擺得太耐會爛，番到屋企就要立即處理煑熟貯存。唔可以煑得太熟，亦唔好翻得太多，因為出水太多，加小許鹽吊出番茄鮮味，然後加茄汁兜兩下就唔使落糖要炒到出水。

攪掂、等番茄涼透就可以放入容器

只要容器嘅密封程度足夠，一般放喺雪櫃冰格，可以貯存三幾個月都唔會有冰雪味，而食物營養，維他命亦唔會受冷而消失。

雨中家個雪櫃冰格經常有備用存貨，拎起就有得用嚟配搭。

呢次啲矮瓜賣四毫九仙一磅，三磅左右就有一滿鍋嘞。

上篇寫過「其實係將雪櫃有乜煑乜」呢句，今次煑好嘅矮瓜加茨菇同枝竹就可以上碟。

炒白菜，一般家庭會燒紅鑊落油放菜，但油加熱後會變成有害物質，雨中先生會凍鑊落冷菜，菜洗後仍有水份，加蓋後近乎烚菜將菜煑熟。

菜熟加鹽及少許油，賣相同食時與紅鑊落油放菜似乎冇大分別。

早餐：白菜仔炒蛋山東拉麵

呢包青豆，你都諗唔倒只係一蚊一袋

除咗有一兩條有些少黑點，大致都幾好

洗淨切好，今次配甘荀（紅蘿蔔）

碗裏面嘅係... 係人都唔會食嘅冬菰腳，打碎成粒，雪藏備用。冬菰腳碎有個優點，可以吸入汁味，所以用濃味餸菜例如魚香茄子，雨中先生會取之為首選配料。

加拿大極注重環保，呢個膠箱係市政府逐家逐户送一個，特殊塑料制造容易清洗，放喺厨房收集厨餘。

雨中太夫人教落，青豆食爽，白豆食腍。雨中先生本來聽母親教晦，但每次煑青豆，雨中大嫂定投訴話太硬.... 所以.... 煑青豆同煑乜嘢瓜菜一樣凍鑊落冷菜。

熟咗加鹽吊鮮味，加鼓油使味濃一點。加油之後青豆睇嚟與燒紅鑊落油放菜冇乜分別。

甘荀、冬菰腳碎粒亦係凍鑊落，熟透後重手落棘油，煑透乾水。

加青豆炒幾炒上碟，聞到都想食，賣相唔差亦好惹味。

上次介紹過呢鑊似餿水嘅食物，有椰菜、芋仔、紅蘿白、青蘿白、枝竹、山藥。

呢一鍋係冬菰、豆腐粒炆蘿蔔，睇落似餿水多啲。

呢一鍋係番茄、防風、腐皮加小許蛋花。

講埋個冬瓜先；成十磅重嘅冬瓜只係俾咗三蚊，切咗四份一嚟煲冬瓜湯，落重薑，啲薑貴得驚人，濕到滴水嘅都賣到兩蚊九毫一磅，離晒譜！

剩低嘅四份三，留番部份明日炆豆卜，其餘洗淨切好，放入容器貯入冰格.... 係喎，幾乎唔記得上面七樣瓜菜總共買咗幾多錢添，全部係十蚊八毫子（折港弊六十七元）平嗎？