2014年12月25日 星期四

啼笑皆非




網上圖片



啼笑皆非


現時科技發達,好多事物變化好快,損壞得更快。比喻老雨經常用嘅手寫板同電腦,接二連三出問题,現時電腦哥哥話要放聖誕假,粒聲唔出就down機俾你睇,等你做做吓,突然死機,咁你寫嘅一千幾百字就叫都叫唔住,立即化為烏有,真係喊到唔識收聲,好彩老雨常作兩手準備,立即喺倉底摷番個手提出嚟頂住先。手寫板損壞係板面有花痕,本來用開較為先進嘅,用感應代替擠壓式
嘅手寫板,効果理想,但筆尖損耗咗,又唔知去邊度配,現時寫出來啲字根本與你想要嘅風馬牛不相及,有時更使你啼笑皆非。又係咁好彩,返港期間突福至心靈,買咗一張玻璃面嘅手寫板,個老板話:「玻璃面嘅,如果你都有本事寫得花,咁就真係"功力深厚"嘞!」講真,寫花玻璃面有何難,老雨書櫃就經已有兩塊報銷咗嘅!



講起啼笑皆非....最近的確有件事,諗起都好笑,唔單係好笑,而且
係啼笑皆非。其實件事係好簡單,不過出事嘅過程同结局都出人意表,竟然會牽涉到道義同法律。乜咁大劑,冇咁大劑又㸃會使人哭笑不得。不過好彩「喺百厭嘅巧妙安排下」!化腐朽為神奇、化戾氣為祥和,最终「神不知鬼不覺,偷雞就係老狐狸」,老雨畧施小計,只見百厭車出車入,騰來騰去,滿面安祥其實滿肚密圈去諗計仔。



話說十二月十三日下午開車到機場,接來到加拿大温哥華的「美好」(May Ho)
一家三口。早前經已知道佢地人少少但行李多多,果然冇錯,好彩架車都算爭氣,一口氣啃晒大大少少八件行李,冇使百厭丟臉。好嘞,諗住俾幾日時間佢地戰勝時間差,星期二至同佢地食飯。咁嗰日約好咗早上十㸃去接佢地。嗰朝早游完水,百厭嫂喺更衣室滋滋整整,搞呢樣搞嗰樣,遲晒大到!飛到架車甩轆趕到去,見賢伉儷經已行咗出嚟,企喺寒風之中,塊面口仲驚過百厭。百厭當然將遲到之事攬晒上身啦,話唔好意思呀「我」遲到添!點知美好一開口就話:「你今日有冇特別安排.....唔知點同你講....我地個女闖咗禍呀!」百厭連忙打個突,闖咗禍?可大可小!隔牆有耳何況大街大巷,連忙招呼兩位上車說:「有事慢慢講,急都急唔嚟,上車先揾個地方至相量。」



話雖如此,做亞媽嘅梗係緊張啲嘅,喺架車就一五一十道來。百厭一邊開車一邊諗計仔.百厭嫂就一邊聽一邊分析;呢啲係道義問题,如果咁樣咁樣,可能會涉及法律喎......咁大劑,係呀!大劑得嚟你又會笑丢下巴!




究竟發生咗乜野事?美好話等佢十二月三十一日番到香港至同你地講喎!或者佢寫博卦,想知就留意吓佢個博客啦,不過唔知會唔會寫得百厭咁生鬼呢?呢一段暫時唔關我事。




好嘞,車停低咗,大家行入餐㕔,㸃好吃嘅,百厭仍然保持緘默,佢地尚在想如何對策。正是「名家一岀手,便知有沒有」,雨中大俠终於開腔說:「只要這樣這樣,如此如此,避重就輕便可以撓過道義同法律責任。」跟着開始調兵遣將:我地食完呢餐先去了解....情況,然後亞邊個邊個跟我一道去「擸傢生」,然後去拆呢樣嗰樣,做佢世界。到時亞福同亞水留係出事現場,架車停喺邊度「接應」,啲「屍骸」丢去邊度「毁屍滅跡」!呵呵!一口氣講出全盆計劃無瑕可擊。



一個成功嘅計劃就先要有良好嘅步署,如是者「落雨劏雞客雨中淋」雨大俠出手!使出「神不知鬼不覺」神功,不單偷天換日,還始終無人知「偷雞就是雨中淋」!「偷雞」行動順利結束,整個過程只了過個半小時,其實有半小時百厭同亞邊個邊個踎喺「麥當勞」静觀其變嘆咖啡,另外亞福同亞水留喺現場打咗個半鐘頭牙較,可謂「西線無戰事」平安度過。嗰晚就喺「
百厭府慶功,吃完個便飯,美好走過嚟攬攬老雨,喊住口咁話:「如果今日冇你(出手),都唔知點算。」百厭係曳唧,就係最怕人對住百厭喊,連忙話「多謝都唔使喊格!」隨即想起美好喺起程前寫咗個貓貓話:「Kent哥,今次好彩有你!」既然人家多謝你在先,預咗嘅啦!咭咭!




張貼留言