2014年8月17日星期日

又大一歲!

又大一歲!



每年八月,都有一種感覺:又大一歲!
兒時每年嘅生日,嫲嫲一定會為呢個孻孫準備兩個紅雞蛋加一封利是,摸住小雨個頭話:「又大一歲嘞,要聽教聽話、俾心機讀書,第日揾份好工.....」十幾年來如是,唸到小雨都識背誦。嫲嫲終老後,父母親忙為生活,每年生日再冇人向小雨叮嚀囑咐,咁咪.....大耳牛乜都唔記得,掛住玩荒廢咗學業囉!



講開又講,就係因為咁,小雨到依家老雨,做過最卑微嘅職業貨車跟車伕力;亦當過大企業權掌集貯存運輸於一身嘅倉務經理。一生中做過教師、監獄署伙記、貨運從業員(好過寫做苦力卦!)、巴士司機、倉務經理。移民後也曾有大起大落,做過掘地泥工,亦被香港某獵頭公司選中推薦,受聘於日本日立化工與港資企業合資,開拓中國厰房嘅總經理。人生就如大海,過程會平靜,也會波濤、遭遇有時喺波峯,也有時喺波谷,一切都係緣起緣滅。



或者你會問老雨:「一生中做過咁多行業,邊一份對你影響最深?」不瞞你說,老雨自小就知道自己唔係從商嘅料子,因為耳仔軟太易信人,但相信只要自己對人好,人家對你一定會好。行商係咁就弊傢伙嘞!所以自小就冇諗過做生意,讀書唔成加上胸無大志,做得乜唧!老雨個百厭乖女妍瓦,成日揶揄佢亞爹話「小時唔讀書,大時做運輸(伕力)」,俾佢講中晒。老雨做過咁多行業,每份工都有過不可磨滅嘅回憶。但講你都唔信,對老雨一生影響最深,並非飛黃騰達的經理、總經理,而係喺香港默默為社會作出貢獻嘅巴士司機。




1977年,28歲嘅小雨加入九巴,受訓時,小雨嘅師傅王偉國先生拎住小雨個「快佬」,當住其他學員面前,笑住對小雨講:「你中學畢業,呢份工你點捱呀番書仔,我諗呢度一班師兄弟,你第一個走先!」師傅睇錯咗,由學車、考牌、上車開工,成班師兄弟十二人,到1984年只走剩小雨一個。



師傅講得喏:「呢份工你點捱呀番書仔。」如果你開嘅係6.15am 頭班車,你要清早五點鐘要落街等公司接送員工返工嘅「工程車」,當年並未有現時咁多通宵巴士線,如果你錯失咗呢班工程車,你就搭十四座小巴。收工仲弊,如果你錯過深夜12.05am嘅工程車,你要等下一班1.05am,如果呢班都趕唔着,對唔住!尾班工程車2.05am你就一定趕得上。巴士司機工作時間好長,非繁忙時間會減小班次,部份司機駕車回厰「休息」三幾個小時再開,呢種更份叫「特別車」行中稱之為「兩味」(隧巴線最常有特別車),中段休息時間係冇支薪,三幾個小時去得邊,大部份都會留厰消磨時間。朝早晨咁早返工捱到晚間七、八點至番屋企食飯,跟住又要早瞓第日早起,係咪好惡捱呢?以前舊巴士係冇冷氣,車頭機器又爂又熱,加上司機一日見幾百、幾千乘客,控制門閘,留意乘客付車資。車開時又要注意路上情況,經常塞車司機要趕鐘趕點趕轉數,壓力非一般工作能比以。小雨在職時有位英國交通專家曾評估過香港巴士司機:「香港巴士司機稱得上係世界上一級司機,喺香港路面咁窄、車輛咁多,乘客流量咁大,香港司機平均每一秒鐘要做三至四個動作決定(註:如開門、關門、打指揮燈、踩油等)而倫敦巴士司機平均三四秒鐘才做一個動作決定。」(註:寫在今日2014年,早於1977年至1984年地鐵只有荃灣綫和金鐘綫,巴士是當年主要交通工具)雖然如此,巴士司機喺社會上仍然係一份卑微工作,但凡有交通事故,一定話「巴士佬開快車」。其實行走港九嘅巴士,機器鎖定速度唔超過五十公里,不過人會有一種錯覺,一架十幾公尺長雙層巴士,龐然大物喺身邊擦過,塵土飛揚,一定會覺得快,加上市民大多對呢個職業嘅偏見;巴士佬飛站、巴士佬話俾少個毫子都趕落車、巴士佬埋站只開閘落客唔開閘俾人上車、巴士佬乜巴士佬物.....大家都揾兩餐唧,老雨諗冇一個巴士司機會故意留難乘客,相對而言,小雨服務七年,幾次要帶埋亞媽返工俾人「問候」,奈何!



講起「巴士佬開快車」,唔知你仲記唔記得當年有架九巴佐敦至上水70號線巴士,由彌敦道轉窩打老道時反車?當時就係俾人指責話「巴士佬開快車」。等老雨講講呢個故事:當年肇事巴士係利蘭勝利二型(Layland Victory 2)喺行內被稱之為「高脚雞」,因為呢個車種重心太高,平時行直路都感覺左側右側。出事之後,架巴士當然拘留驗車,一切正常,巴士傾斜度唔超過離中軸23度,架巴士唔會反車,官方亦將出事時乘客相等重量嘅沙包放喺事厢內,同樣結果,巴士傾斜超過中軸23度,架車至會反車。一架巴士喺彌敦道同窩打老道交界,咁繁忙嘅交义點,肯定唔會超過三十公里時速「掟彎」,乜野構成意外發生呢?要知道,政府嘅測試,係架巴士完全靜止時進行;如果車輛行進間轉彎,車內乘客會感受一種「離心力」;近百個乘客合共幾千磅,當巴士轉彎時,幾噸重嘅離心力,特別係巴士上層乘客座位多過下層,加上如果有乘客唔生性喺上層站立,轉彎嘅離心力更大,反車嘅機會亦相對更大。



當年事件曾誘發香港市民對巴士安全嘅關注,呢點絕對正確,因為每個市民;包括司機同乘客都希望「開開心心上巴士、平平安安番屋企」。當時港督麥理浩委任港大副教授古兆龍先生,專門研究巴士司機作息生活,直接向港督滙報。古教授唔知喺邊度知道九巴113隧道線有個有多少學識文化嘅「卡佬」(行內人稱巴士司機為卡佬,何解?唔知!),小雨向古教授分兩次會面共八個小時,將自己親身經歷、感受、體會全都提供古教授。兩個月後古教授給小雨打咗個電話,安撫咁同小雨講:「你提供嘅所有資料都寫咗喺報告上,但希望你唔好期望太大。」果然,政府官方提及嘅巴士司機生活作息報告,只係話巴士司機投訴司機位的椅子太低,坐得不舒服,就是這樣了。(了結!)



每個人都有尊嚴,可能大家都曾被巴士佬惡言相向,或者感受過被愚弄,心中有不快!老雨當年曾經用呢個舉例同古教授講﹔「如果你嘅職業係要經常搭巴士,一日之中最多會遇上七八個巴士司機,但你知唔知一個巴士司機每日會遇見幾多乘客,以我服務嘅113線由彩虹到石塘咀,一更(三轉車)最少乘載千多個乘客,只要一個乘客對你唔滿意,就可以投訴你。如果我係個乞兒放個碟喺前面乞食,你經過好心會輕輕放低一個幾亳,但你知唔知每一日有幾多乘客將錢不屑咁掟入錢箱,(當年香港未有八達通,上車自備輔幣),呢種被愚弄、被侮辱嘅感覺,你體會得到嗎?巴士司機有投訴之門嗎?」



七年巴士司機嘅生活,鍛練咗小雨嘅忍耐,不單係身體能力忍耐,而且係精神性格忍耐,不過最重要係刻骨銘心嘅一次,改變咗小雨一生對自己嘅睇法。小雨並非仁仁君子,況且性格不覊,不拘小節,講得出就講.....直至有日收工,喺站頭同工友談天說地,興高采烈,言語間當然粗口橫飛。有位少女走到小雨面前,好失望咁問小雨:「先生,你姓陸?你係陸老師嗎?」小雨望住佢依稀認得,小雨曾喺西環一間位於青蓮台嘅中學,教中一班英文嘅一個學生。痛定思痛方發覺,每個職業都有自己嘅尊嚴,小雨當年唔識珍惜同尊重.....從嗰次起戒掉呢種令人生厭嘅言語惡習!



明天!呵呵.... 又大一歲!


37 則留言:

人在雨中淋 說...

藉此文向仍在香港默默耕耘為社會作貢獻的巴士司機致意!
也藉此文解答網友Wei姊問百厭為何這清楚山市街和青蓮台。

wei-wei 說...

祝雨兄生日快樂、身體健康。
啊! 原來陸 Sir 曾是漢華中學的英文老師。不過昔日在青年台的漢華中學校址已改建住宅大廈了。

Stella Luk 說...

恭喜飛仔福如東海!壽比南山!並祝羽毛球高手陸老師春風化雨,桃李滿門!

五味軒 說...

大哥:生日快樂!身體健康!白壁藏珍等緊你剪綵!

Unknown 說...

PPK, 又大一歲啦! 要聽教聽話呀! 😁
祝你生日快樂、身體健康,搬了新家之繼續生活愉快!

凌子卉 說...

百厭,生日快樂!很榮幸,認識您!

mayho 說...

雨兄:你快d去剪綵,睇見都想食.
身體健康!心想事成!

匿名 說...

老雨移民只是心口同背脊寫個勇字,乜都唔識,英文又水,做其乜都敢死隊。

陸先生,你太謙了,六七十年代的中學畢業生水平很高的,能夠當中一的英文老師,又係中外合資工廠的總經理,加上你的努力,成功是必然的!
周融都係中學畢業,當年也能當英文星報的編輯,幾年前差點能當上廣播處長!曾陰權也不是中學畢業嗎!
HAPPY BIRTHDAY!!

red yellow 說...

雨兄,
非等閒之輩,
樣樣都得
又教書,
又揸巴士,
生活經驗非常豐富,
怪不得文章小說寫得細膩。
生日快樂!

Unknown 說...

妍瓦摸住老雨個頭話:又大一歲嘞,要個身體聽教聽話、俾心機享受人生呀! hehe
祝亞爹長命百歲不作病, 年年平安樂天倫

Shu Siu (如心恕也) 說...

搭巴士,有飛車感覺的是港島赤柱的六號線,如果有人經常乘搭就知我講的是甚麼。
祝雨兄生日快樂,年年有今日,歲歲有今朝,身體健康,生活愉快!

匿名 說...

雨兄
祝生日快樂,身體健康,
生活輕鬆寫意,富貴吉祥.
飛鳥.^O^.

翠兒 說...

祝雨大俠:生日快樂、身體健康!福如東海、壽比南山!

人在雨中淋 說...

當年為兩餐做一份可恥待遇、誤人子弟教職,不過算係敬業樂業,當年仍盡量用最淺易全英語授課,學生却聽得明白,番書仔嘛!另外山市街曾經係113隧巴石塘咀總站,記得總站旁係士多辦館,另一邊有一家庭式奶茶咖啡三文治店,每日第一轉車,小雨一定「埋站」嘆咖啡....一說又三十幾年,最上次回港,坐上113線行咗一轉,每個站,每條街,每個燈位還記憶猷新。

人在雨中淋 說...

好多謝宗姊!十月回港探你!

人在雨中淋 說...

俾百厭食晒咯!下次番嚟五姐定為百厭增磅!
多謝亞May!衷心感謝!

人在雨中淋 說...

乜啲「台詞」咁熟嘅......
多謝晴兒!PPk有你地呢班咁好嘅朋友,還有何憾!感恩....

人在雨中淋 說...

認識是個緣,一叔唔俾百厭激親....仲話榮幸?多謝你,子卉!

人在雨中淋 說...

老雨係「見到鬼佬口啞啞」嗰種,因為唔同嘅地方口音有別,所以先頭好多要斷估,人地一樣聽唔明,不過加國人好友善,大多唔介意老雨啲水皮英文。
六七十年代只有羅富國同葛亮洪兩間師範學校,柏立基師範剛開始,香港教師不足,所以容許中學畢業生暫准執教小學及初中,大學生可以教高中,當時稱之為暫准教師,老雨當年只不過係濫竽充數而已。

人在雨中淋 說...

洪大俠從那裏學了高帽神功!
多謝洪兄,希望十月回港能與洪兄一敘!

人在雨中淋 說...

呵呵!妍瓦乖,俾封利是仔過百厭女先!

人在雨中淋 說...

冇錯嘞,當年中巴用嚟行走赤柱嘅巴士,就係上面所講嘅「高腳雞」利蘭勝利二型,平時行平路直路都左搖右擺,行司徒拔道同淺水灣道啲咁急同窄嘅路,肯定冇司機掟彎,個感覺都「西嚟西去」。
多謝如心師侄....咭咭!‧

人在雨中淋 說...

飛鳥咁忙都蒙面而來,感激之至!
最近忙乜?

人在雨中淋 說...

翠兒來了!真高興,多謝多謝!

愛Shi家庭 說...

陸SIR:
祝生日快樂, 長食長有!
113,我都有坐過!

Unknown 說...

百厭星..生日快樂..
龍精虎猛..越活越健康..聽教聽話..哈哈

凌子卉 說...

雨兄,生日快樂!
生韻悠吟情誼載,
辰花含蕊聞苞香,
愉慶祝賀輕風傳,
快樂心怡泛淚光。

Unknown 說...

爹,
利是我袋隱了, 帶住佢上西藏. 我已訂了機票 6/9 - 21/9 ,
人們都說去西藏可洗滌心靈, 希望平安回來, 我還未見爹啊.

麻煩 說...

雨兄:生日快樂!日日開心!
自從 “今時今日………” 服務大眾行業嘅從業員 ((="=))

人在雨中淋 說...

多謝多謝!日日開心最重要,Fenny也是!

人在雨中淋 說...

知道了,回來乖女渙然一新....有冇準備應付高山症呀?

人在雨中淋 說...

多謝你!長食長有真開胃嘞!
有冇見過上面嗰個司機呢?....佢幾好人架.....咭咭!

人在雨中淋 說...

魚兒大佬到...
又學埋百厭嫲嫲講聽教聽話?不過呢句話依家一輩好多都唔識講咯。

Unknown 說...

我沒有應真對付的方式, 可有高見?
只買了紅景天去前服一星期. 我見有朋友會去跑步, 但我不夠氣跑. 也不打算在這方面有改善.
最近一星期4天瑜珈一天跳舞. 早星期測過體能合格. 80分.
如果到達後真的不能適應, 只好回頭, 有些事不能勉強.

Unknown 說...

昨天突然醒起, 忘記了說, 但現在我大聲說........................多謝亞爹利是 : )

秋葉 說...

遲來的祝福:祝雨中十四郎兄生辰快樂,關府慶吉祥!
駕駛巴士真是超高難度的工作!因為秋葉也有親友在巴士上工作;舍兄在未退休前是職業司機,退休後也駕駛過小巴。
當屯門公路初開放行車的頭一兩年,乘客多不習慣坐長途車,見到車巴士駛得慢,樓上有個男乘客很鼓噪,用力拍打車身,大罵司機!
當時我深感不妙,立刻回應:「唔好騷擾司機!係唔係想反車?」可能他想起屯門公路在不久前曾經有巴士衝落土坡,就收了聲了。

秋葉 說...

更正:是「闔府慶吉祥」抱歉打錯了「關」字。