2016 Air Show Abbotsford Canada

踏足加拿大後五年，一九九三年才第一次去看航空展。每年初秋，卑詩省嘅Abbotsford市會舉行一次航空展，亦可以算是加拿大單調乏味生活中，人民為之雀躍盛事。「阿波斯福 Abbotsford 」航空展並非國際航展，所以冇好似其他國際航展咁大規模，展出航空戰機種類陳舊過時，亦冇如空中巴士A350，或波音777等先進嘅客機，更冇吸引富豪嘅私人商務機，所以一隔二十多年至去一次，似乎亦冇多大損失。

先說 Abbotsford 阿波斯福呢個地名嘅笑話：早年嚟加拿大嘅華僑，大多係原藉廣東台山，有稱之為「台山阿伯」。台山話幾接近廣府話，只不過音有少許不同。老華僑大多英語唔係咁流利，如果你用唔咸唔淡台山話讀阿波斯福會變成點。咭咭，百厭（好耐冇人咁稱呼老雨矣！）冇講衰野呀！咭咭！

百厭都話阿伯XX 個航空展冇野睇啦，上面呢架係美國A10，前兩年經己全部退役，今年花旗佬仲拎番出嚟呃啲楓葉DD....

記得一九九三年百厭帶住一家，又係咁頭岳岳望住呢過A10前面嗰枝機關炮，當年真係一時無兩，現年呢種自動武器仍廣泛應用喺海軍近海艦同陸軍裝甲戰車上

嘩！仲舊，大力士 Hercules 運輸機，直頭同B52嗰個年代嘅，不過花旗佬打仗打到冇乜錢剩，B2轟炸機都冇錢整多幾隻，六十幾歲高齢嘅B52都要拎番出嚟用，何況Hercules

呢個角度睇都幾有氣勢喎

加拿大嘅公民教育幾好，大家好安份咁排隊入去睇駕駛艙... 鬼咩，出面驕陽似火，成三十度攝氏，入嚟呢度人係多啲，都好過喺出面乾煎

呢架係全場唯一嘅先進戰機，花旗佬F35，每架成億美金.... 噫！冇乜人睇喎，現場空洞洞冇人嘅？非也！係眼看手勿動，成隻戰機俾鐵馬圍住，只可遠觀

楓葉隊出場嘞！金牌在望，拍定手掌呀

表演嘅好！揸機嘅都要考功夫，要捕捉住一閃即逝嘅鏡頭真不容易

與其話佢地表演跳傘，不如話佢地喺空中畫水墨畫，真美

水墨有深有淺，一天藍幕襯托，醉也

影呢三相係用攝錄機，冇連環快拍功能，好彩還可以

跳傘員徐徐着地！好

好耐冇用呢部單鏡反光攝錄機，佢有錄像功能，亦有拍攝功能，幾年冇用，拎番上手一時手忙脚亂，影相拑錯錄影，錄影時又唔記得將部機轉番錄影功能，拑極都唔去。亦好耐冇影咁動態嘅對象，顧得睇鏡頭，隻飛機都唔知去咗邊

後來慢慢習慣啲啲，太陽猛烈四圍光撐撐，唯有放棄用LED顯示板，直接用觀景器抓拍.... 仲弊，觀景器只係一個小洞，根本追唔到飛機，而且太遠，最後係用眼睇天，知飛機位置，用鏡頭扯佢埋嚟

今年有幾次機種表演外，還有兩次軍機表演，一隊是英國，另一隊是加國嘅Snow Bird，手忙脚亂咁影咗啲硬相同動態錄像

前兩張係英國隊，後兩張係楓葉國嘅雪鳥

好耐冇用過部機Sony NEX VG10，依家拎番上手，覺得好重，可能年紀真的大了，托住佢影成日嘅 video，冇瓦遮頭，又晒又熱真係好辛苦.... 又好耐冇上載短片喺youtube，剛上咗兩條短片，都唔知得唔得，得卦？