雨中淋的感情生活「我凑大個老婆...咭咭」

雨中淋的感情生活「我湊大個老婆.... 咭咭！」

記得嗎？喺上上上幾篇，咪有一篇叫做「雨中淋的感情生活 寫在三十五年之後」，介紹過雨中先生同雨中夫人點樣點樣，跟住又點樣點樣，即係點樣唧？想知就轉頭翻查一下啦，呢度唔講嘞。 

記唔記得佢係舞蹈組，而百厭係機巧運動體育組呢？呢張相就係百厭家嘅表演，當時係去旅行，百厭俾百厭嫂踩，做一個叫「順風旗」嘅舞蹈架式，影相嗰個又係嘅，個 Post 都未擺好就影，以前用菲林冇 take two 嘛。睇唔睇見百厭當年真係虎背熊腰，Fit 到簡直漏油。攝於1969年

開始互相扶持的前幾年，真困難，亦真難得。望遠方還是一片霧霾不明朗，咬緊牙根。攝於1970年

利用空暇時間，出外走走，舒一舒煩憂悶氣。攝於1971年茘枝角灣

看單車比賽，百厭按着的就是電單車頭盔。攝於1971年

長洲五行石前；百厭嫂剛完成中學會考，佢想返母校恊恩繼續讀中六，但百厭同佢分析環境、條件等等因素，佢放棄大學之夢想，投身醫護行業。

呢架唔係當年死飛仔百厭架電單車，而係後嚟百厭入咗監獄處做，方便去哥連臣角教導所番工購置另一部，如果個車牌「D890」留到今日都幾值錢。攝於1973年赤柱海灘

1974年百厭嫂開始學護生涯 攝於1974年QE 護士學校

一條好靚嘅「紅衫魚」。攝於1974年QE Hospital

當年但凡學護個男朋友, 都被稱為 QE 姑爺, 百厭都唔例外。

成日讀書, 缺少運動, 百厭專程整咗部單車俾佢, 算唔話得卦。

呢個細路, 花名叫做「院長」, 因為佢因病經常出入醫院, 醫生護士都好鍚佢, 幾歲仔又鬼咁精靈, 最後.... 百厭嫂喊咗一晚。

百厭嫂話：「Doctor Wong 話想追我，仲約我食飯行街睇戲喎。」百厭話：「你咪去到夠囉！不過呢度冇船返香港。」

（以上對白係百厭老作）攝於1976年長洲

1978年9月6日，結束十年愛情長跑，拉埋個天窗，去完動物園（乜唔係渡蜜月咩），入赤柱探班自細玩到大嘅朋友。 
攝於1978年赤柱軍人墳場

點知個前度女友.... 即係當時個百厭嫂話，嗰次游完水，二話不說就走去註冊結婚唔算數嘅，因為百厭冇向佢求婚喎，好個百厭就當一眾鄉紳父老叔伯兄弟面前，案件重演，百厭話：「How do you do？」百厭嫂就經已急不及待話：「I do！」

（對白又係百厭老作）

護士學校畢業。攝於1977年

1979年助產士校畢業，跟住佢就喺產科攞正牌做「二姑執媽」，執仔無數。直至1984年，美國一次交通意外.....

嗰次意外係橫過馬路時俾個新牌司機，將百厭嫂成個炒起，膝部重創，學名叫 Bumper crash，整個膝蓋及部份下肢骨骼，要係盆骨取骨片修補。經過差不多年半治療才恢復工作。起先調入血庫，其後調回外科，經常要走動，有見及此，佢重新拿起書本，讀一年社康護理。攝於1987年

社康護理護士畢業。攝於1987年

與老師及同學合照。

畢業後，因為家住元朗，所以被調返元朗健康院，朝九晚五，唔駛返夜更。
攝於1988年

好景不常.... 正喺百厭嫂擔緊櫈仔排隊等升護士長，百厭個衰鬼話要移民喎。
攝於1989年移民前夕，同事依依不捨

係咁，百厭家就放棄香港的一切家業，帶着兩孩子，嚟到呢個完全陌生嘅地方，從零開始重新再來。百厭嫂要再讀書考牌，那段日子前路茫茫，百厭家並非腰纏萬貫，移民後三個月，銀行儲蓄只剩下三百加元。百厭和百厭嫂如以往一樣咬緊牙根，克服工作困難，語言障礙；沒有怨言、沒頂過一句嘴，捱了下來。

攝於1994年Stanley Park

  

喺百厭家出現經濟危機時，百厭做過泥工喺馬路邊掘路，亦放逐過去温哥華島北部做散工，兩三個星期至返屋企一次。有次打電話番屋企，知道百厭嫂考試合格並立即受聘於

Royal Columbian Hospital，當時真係百感交集。網上圖片

繼續做婦產科，與香港唔同嘅係一更係十二個小時，通常係返兩日day shift   兩日night shift，然後休息五日。香港護理係流水作業式，呢度護理係有計劃，如果有需要會一對一即係一個護士對一個病人，叫做 total patient care。

網上圖片取自文章Royal Columbian Hospital saved my life

1989年到今年2014，百厭嫂工作未離開過婦產科，到今年1月百厭嫂年屆六十，百般捨不得... 捨不得十幾廿年嘅同事，捨不得幾好嘅待遇，捨不得優厚嘅福利..... 要退休了。消息一傳開，耆英球會嘅好朋友，安排一個驚喜晚餐給百厭嫂。

有三四十位好朋友参加，過程中，百厭嫂被蒙在鼓裡，直至俾人請出嚟至知乜事，有朋友個孫係百厭嫂帮過手接生，又有幾個嘅女兒或新抱入院生BB，由百厭嫂照顧過，佢地由其中一位代表送上花束。

百厭嫂接過花，真係好開心，四十一年護理生涯終於劃上個「逗號」，因為佢話先休息一段時間後，如果覺得悶，會返醫院做casual喎.....

你地睇下百厭幾得戚，梗係啦，以前有百厭嘅長輩，佢地睇住百厭同百厭嫂一齊青梅竹馬長大、佢地都話「百厭嫂係百厭凑大嘅」，此刻真係有呢個感覺：「我凑大個老婆.... 咭咭！」