單車環台遊

單車環台遊

今年参與Cops for Cancer警察籌款活動第八天，老雨被邀請同班後生大隻兼紀律嚴謹嘅警察哥哥姊姊一齊踩車，完成106公里後，大家都諗唔到，居然「甩」唔倒呢個66歲嘅老傢伙，話要同老雨影番張相。大家都好開心，咭咭，老雨當然企中間啦，VIP喎！（very inch person）咭咭！

每年嚟到呢個碼頭嘅指定動作，梗係影番張全體相。呢張隊員係主人翁，支援人員企兩邊，老雨？揾個放大鏡睇睇,,,,,見唔見呀？

今年到呢條橋雨水好似倒水咁，嗱嗱聲影張「指定動作」就即走..... 放大鏡呢？

記唔記得去年老雨返港，臨回程前對朋友講，話2015年會再重臨香江，除咗飲姨甥喜讌外，順道到台灣踩單車環台一轉。事前做好晒資料搜集；據台灣波友稱十一月台灣本土風和日麗小雨水，颱風季節亦過去，係最理想嘅單車環島時間。還有台灣泳友（與雨中兩老一齊游水嘅長者耆英朋友），紛紛話到咗台灣可以「投靠」佢地，由台南到台北，花蓮到高雄都唔使揾地方住，班台友真俾面，朋友遍台灣，老雨突然覺得何其自豪。

不過老雨嘅計劃係参加台灣一家單車生產商，舉辦嘅旅程。

第一，唔使自己安排行程。如果要老雨踩到「夜嘛嘛」，通街揾人收留，真係唔得佢Ｃ咯。

第二，唔使自己帶單車。主辦旅程嘅生產商供應單車，老雨只需要帶對脚踏同單車鞋就可以輕裝上路。

第三，旅程有工程車及供應車跟隨或在前站等候，連行李都唔使拎，只需要踩呀踩呀.... 盡情享受。

老雨如果後生廿年，唔使拍心口都可以單「車」上路，喂！依家六十過半，唔係冇志氣，有！ 點會冇唧，而係「講就天下無敵，做就有心無力」，講、做分咗家久矣！好似前兩日上屋頂修理水橺，講咗好耐要整，拖拖拉拉幾年，終於「屋漏更兼連夜雨」，個太陽房漏水好似個水瓜棚咁，卒之咪「的」起心肝，擔張梯脚震震爬上屋頂，心血都出埋踎足七個鐘頭，將爛咗嘅木板，塑料拆去，重新裝上好嘅材料。呢個係希望能一勞永逸工程，又要花好多心思去想通想透點至唔會再漏水。做完落番地面周身骨痛，老矣！ 好彩第二日打羽毛球雄風仍在。

講番踩單車環台嘞；怎料安排上失誤，班車友（老雨犀利卦，有波友、泳友同車友，加埋網友、老友、豬朋狗友，稱雨中七友）得老雨自己一個去，咁就當然要延期啦，加上雨中府第裝修，用到家空物淨，2015返香港？取消了！ 對不起，錯開了一張空頭支票給大家.... 嗚嗚！

五味軒（亞五）個細仔，居然超越老雨，與佢兩個車友自駕單車環台，恨得老雨牙癢癢... 亞五就擔心到個心跌咗出嚟咁....提携後輩係老雨最牙擦嘅一瓣，加上老雨一貫同輩論交，只要是能平等禮待，不管年紀性別，老雨都交得上朋友，所以不斷向亞五個濤仔教路；怎樣怎樣留氣踩長途，如何如何用盡腳部和脚踏去省力....

濤仔很乖，給老雨一些佢在台踩車照片，佢話等佢抵達「武嶺」再會俾老雨照片，也好！填補一下老人家失去了的那一片空白。

太陽房剛鋪上新所膠膜地台

太陽房加建於1994年，係老雨傑作之一，點知二十年後，竟然漏水俾老雨嘆

你有冇畏高呢？老雨就冇嘞，不過擔張梯脚震震至爬倒上屋頂，真係唔認老都唔得

就係呢塊白色塑料累事，上一塊殘舊兼破裂，有百分之八十掉脫，雨水落喺屋頂彈起飛越水橺落入太陽房內，換咗嘞

呢塊白色塑料係循環再用物料，應該比上一塊耐用幾倍，貴唔貴？都話係recycle咯，係癈物再用

年中很少爬上屋頂，高處看來寧靜安詳，如看一幅畫

今年踩車係老雨重新上車以來最積極一年，原因除咗為環台準備外，減了近二十磅後，負重減少了，重新感覺速度的快感，興趣自然重現。呢架車用咗三年，對車轆係二十年前產品，別看它前只有十四條鋼綫，後得十六條，仍然能承受百四五磅重力和近半噸重嘅衝擊壓力，風采依然。那踩車嗰個....仲使講咩！

踩單車最難克服係上斜，體能及心理都要過關，好多人見上坡，或上得咁上下放棄，個心會諗：「仲有咁長嘅斜路，點捱呀」。咁就輸咗俾自己定力不足，當堅持下去而抵高處，如果能回頭一看......所捱過的，不過如是！人生也如是

上圖是捱斜後抵達省級公園牌坊前

上次番香港，獲香港單車名宿陳撝磊同一班世運舊將，組辦嘅温拿車會送咗一套戰衣，好珍貴唔捨得著，係咪好靚呢？一套連褲四件頭，擋風衣內還有兩件，咁凍，下次至剝俾你地睇

呢架車係全炭纖維，係此類一整塊型式炭纖車架嘅第一代，架車經已十八年車齡，翻新後巧手嘅工匠用air brush在車架噴上了二百多塊楓葉，一對同年代以炭纖車轆，每隻由八片薄如咭紙所炭纖支撑，是極品。

主人翁出塲嘞，亞五個細公子濤仔，正在環台旅途中，剛收到佢嘅WA，佢話喺綠島休息玩番幾日，估計十一月九日征服武嶺！有志氣，有毅力，撐你！濤仔加油！