2015年1月7日 星期三

續... 啼笑皆非



網上圖片


續... 啼笑皆非


受博友美好所託,寫埋「啼笑皆非」嘅續集,但呢幾日真係好忙,主要係香港帶咗兩個「智能手機」番嚟,要同呢兩部機鬥法。本來對電腦知識經已係麻麻地嘅雨中先生,對住呢兩部外貌同體積與電腦原全唔同嘅傢伙,當然打出與接收係冇問題,但當接觸到現時代功能嘅WhatsAppViber就一籌莫展。你梗係喺度咪咪咀笑雨中先生低B嘞!冇錯喎!基本上智能手機大部份喺用電腦嘅「方言」及程式,但經過簡化同壓縮,應用喺手機上。不過大部份程式,留大量空間俾手機主人自己嚟選擇同設定。咁就玩死嘞!因為好似雨中先生呢類落後、無知嘅第一次用家,起先「連線」係點樣去連都未識,都唔好講去做setting嘞。最惨係雨中嫂子心口掛個"勇"字,睇佢似模似樣,呢度拑下,嗰度劃下...係又load,唔係又"撈",梗係NO啦,卒之咪成部手機塞過嚟雨中先生呢個「乜都敢死隊」隻手度....



好嘞,終於都係「名家一出手、就知有沒有」,搞掂收工,趁雨中嫂子與朋友外出,屋企「靜英英」,最適宜寫博娛人娛已,提筆再起寫寫博友美好遊温哥華時一起趣事。



應美好留言:「大哥都係你執筆啦,如果我寫只有幾隻字,你寫就精彩絕倫....可唔可以同(邊個邊個、亞福亞水)改過個藝名,等我地一炮而紅,一句謝謝你!」講到改名,雨中先生强項專長,連忙回應:「改個藝名....咭咭!你就叫"何可賀",李DeDe(雨嫂咁稱呼佢嘅),就叫"好小李"啦!咭咭!仲有個囡囡叫「破壞王」。包你地一炮而紅,紅過個利是封!」


先交待故事中三個主要角色:「何可賀」,女。為人樂觀,常笑呵呵呵,故名「何可賀」,此名亦能解作:任"何"事都"可喜可賀",吉祥也!「好小李」男,李先生係何可賀嘅丈夫,退役藍帽子。話說當年認識可賀時,俾可賀第一個印象是「好一個小李子」;小李就憑呢個概念就成為今時今日嘅「好小李」嘞!第三位係「破壞王」,女。係好小李同何可賀嘅囡囡,其身形有啲似大力水手個女朋友奥莉花。



接番上文其中一句,繼續寫落去:「有事慢慢講,急都急唔嚟,上車先揾個地方至相量。」話雖如此,做亞媽嘅梗係緊張啲嘅,喺架車就一五一十道來。原來破壞王今次嚟温市,為咗俾爸媽多啲私人空間、加上自己亦慣過獨居生活,所以預先託朋友租附近一幢大厦嘅客房單位,呢類單位稱為Guest Room,係大厦方便住客嘅來訪親友短期租用,獨立門户出入,客房有三百呎左右,有洗手間及浴皿等用具,不設廚房不能舉炊,但租金只是四星酒店嘅一半,相當便宜。



話說日前「破壞王」急於用廁,廁所門竟然意外反鎖咗,求助無門「開」,佢「急」於無奈,也迫於無奈,急起嚟伸腳便踢,竟然將廁所門門板上踢穿咗兩個「姑窿」。門雖然踢爛,但未至爛到可以伸手入內將門鎖開啟,最後「破壞王」這刻此可忍孰不可忍,一個轉身飛踢,撑雞天殘腳一招,將廁門下半部份踢斷裂,以奥莉花咁嘅身形,喺斷裂咗嘅門同門框嘅罅隙,爬牛吽爬咗入去。奥莉花破壞王做完要做嘅事後,望住俾自己踢爆嘅門,抽一口涼氣,想:「呢劑大咯!」



佢第一個想法係點樣向代佢租住嘅朋友交待,第二個想法係點樣至可以修理番隻門。破壞王立即上網去揾有關資料,馬上出動去店舖睇睇有冇同形狀、同呎吋嘅門,最緊要係佢呢幾腳踢走咗幾多錢。當然,人家成日都咁講,「如果問題可以用錢解決得了嘅,咁就不成問題」,現時擺喺何可賀好小李一家面前唔單止係錢銀嘅問題,而係如果唔通知大厦管理處,涉及係道義,因為人家會怪責代租單位嘅友人;如果邊個都唔通知一走了之,咁就變咗「租霸」,要承擔法律責任。終於破壞王找到一家建築材料供應商 Home Depot,有同樣呎吋嘅板門,要價一百加元,唔包運費。跟住,佢將自己解決唔倒嘅難題,一腳傳中,交咗個波俾佢信任得過嘅爸媽,自己就飛咗落美國去滑雪喎。



何可賀喺呢度三唔識七,落地三日連東南西北都未分得清楚,手機又冇,雙手執住個女交過嚟嘅"燙手山芋"都唔知點算!仲話過幾日就要退租交房添,點算呢?好小李大爺唔係唔理,而係做慣咗"好小李"之後就唔知點理。當佢地見到雨中大俠到,有如大海茫茫執住一條救生草,好歹都拉住先。雨中大俠聽完個古仔後,唔理佢地絮絮不休,只係講咗一句:「先去客房單位睇睇,再諗辦法。」當雨中大俠見嗰塊被踢穿兩個姑窿、門腳整塊斷裂嘅門殘骸,真係啼笑皆非‧‧‧以破壞王纖瘦弱小嘅身形,有能將門板踢成板木全飛,再細心睇真啲,呢度門係空心門,兩邊門板唔係木板而係"快把",門架係用木糠加膠壓成四方條子,中間分隔兩片門板嘅用料竟然係紙皮,哈哈!唔怪得一兩脚就散晒啦。度好呎吋,係一般廁所門標準30吋乘80吋,咁就容易辦嘞!




講真,如果要雨中大俠出手,抬件門板番嚟,度啱位,鑽個門鎖窿,鑿三個門較位,將度新門安番上去有何難!不過,呢個釘釘揼揼、用電鑽鑽門鎖窿嘅過程一定會驚動鄰居或管理處,還有一樣就係只要老眼昏花,工序呎吋有小許偏差,隻門就上唔番上去,咁就弊傢伙嘞!


何可賀、好小李同雨中嫂子繼續喺架車上同喺餐廳研究道義同法律責任,雨中大俠終於開腔:「我地食完飯先到一家我以前幫趁過嘅做門專門店,(就喺雨中府附近)睇睇有冇適合用嘅白色門板,如果有,問佢地能否加工做門較位同開門鎖窿位,當然要問幾多錢!」「如果一切如願,食完餐飯大家一齊番雨中府"擸傢生” ,去客房單位成隻爛門折出嚟,俾度啲專業師傅,用專業機器印住嚟做,咁呎吋就一定冇錯,一定安得番上去嘞。」果然一切順利,人家專業,呎吋準確,用嘅亦真材實料木板門,隻爛門同你掉埋。雨中大俠上車司機落車咕哩,一拆一裝,慳水又慳力、神不知鬼不覺,正是「明修棧道、暗渡陳倉」偷雞就是老狐狸!

咭...... 你估吓,破壞王呢幾腳一踢要花費幾多錢?