2014年12月5日星期五

絕代雙嬌之冰火對決




絕代双嬌合訂本得五味軒編輯成書,繪上美麗內頁,花上不少心思。老雨無言感激

絕代雙嬌之冰火對決

絕代双嬌一文雖然塵埃落定已久,百厭為完我家上大人之願,將之重新整理,故事內容沒有改動,只係想睇睇有冇「睇漏眼」嘅錯白字,以免貽笑大方。人家說:「文章是自己的好」,百厭當然也不例外,喺整理過程中少不免孤芳自賞,人之常情。 好! 寫得好!



再睇埋當年人家嘅回應,有好多個回應比文中所說更好更有趣更精彩,最有趣嘅係余樞基同江諾山,两位都係釣魚發燒友,百厭就俾佢地其中一位質疑:「點解奸人都鍾意釣魚嘅?」。另外一位則說:「你殺咗我啦!我唔想做奸角呀。」還有嘅係有位女仕為求喺「絕代双嬌」一文中有一個角色, 佢話安排佢做"G"都唔緊要。G 咭咭!



咁當然,大家都想有一個心儀嘅名字,啲名改得幾好吖!最勁莫過於「瞧余奸毒余樞基」「了斷無痕寒春日」「揪飛一葉葉依秋」幾位。最好聽嘅有「雲端影步輕雲」「南疆青劍娜拉」「塞外箭羽瑪姬」「夢中仙如夢姑娘」「神算紀爾雅」「鬼卜紀思磬」。最可愛嘅有「花前、月下」木蘭姑娘同月兒姑娘。當然仲有正氣凜然嘅「吔烏域主」「一憂大師」「西域雲尼」「天涯俠醫」「江南子」等等。搞笑啲嘅有「辛月十二郎」「無喜怒」「口花太歲」「四脚蛇」「華三少」仲有就係「落雨劏雞客」。不過百厭尚為花子姑娘個名耿耿於懷,雖然故意喺古仔中俾花子掹咗幾絲胡鬚,百厭仍未放過自己。



最有趣嘅人物當然係「廚癡五大姐」,好彩我五姐好玩得冇怪到百厭。最「陰功」嘅人物係「中原一點窮窮瘋婁」佢俾百厭任意擺佈,最終俾人家一句「好安達」就自我發配邊疆。呢單野唔怪得百厭,要怪就怪佢啦.....最難寫嘅人物非「嶼火島主菊無艷」莫屬,因為佢五時花六時變,終於百厭把心一橫,睬佢都傻,屠筆在手,刻劃出一個菊嶼火,由一個「火棘棘」,卒之變咗「小兵兵」,跟住質埋個白武士俾佢,仲監佢上埋花轎添。咭咭!



牡丹雖好尚要綠葉扶持,仲有一大班好朋友,戲份唔多,但係喺台前亮一亮相,驚為天人,就好似「火鳳凰言自語」同百厭個乖女「小師妹妍瓦姑娘」對決嗰場,塑造咗火鳳凰為長輩者嘅氣量,亦寫出小妍瓦為晚輩嘅謙卑,戲唔長但精彩,此刻重温仍回味無窮。


 百厭為乖女妍瓦畫的一幅塗鴉,百厭女話最似就係個「標準笑容」

圈中站出一位英姿颯爽嘅女俠「火鳳凰」言自語,她挑了江南子嘅「關門弟子」姸瓦姑娘做對手,聲言十招之內不取姸瓦便算輸了。小姸瓦先向師父拱手行禮,步出塲中。夢影劍羽都想睇睇師父嘅關門弟子,大家嘅「小師妹」火侯如何。一個赫赫有名嘅火鳳凰言女俠,一個是初出茅蘆嘅小女孩,一眼睇落就立見高下。但係英雄豪傑見小姸瓦先向師父行禮方出塲,知此女武學修為亦不淺,妨且小姸瓦的確係練武嘅好材料。「火鳳凰」見姸瓦步出,經已驚訝不已,好一個少年女俠客嘅風範。


小姸瓦將劍尖向下双手抱拳向「火鳳凰」行禮,然後將劍收在背後,咁樣係後輩與前輩過招時嘅禮貌,姸瓦將此禮儀做得恰到好處,各豪傑亦為之讚嘆不已。言女俠拿出左鳳劍和右凰劍,两劍均長尺半,屬於短劍類。小姸瓦身形高佻,手執一口三尺半「傲然」硬劍,英氣迫人;揮此劍者瀟洒自如、既來之則安之、既去之則安之,一點也無牽沾。言女俠刷刷刷連進三招,好個姸瓦,劍「傲然」不動,閃避了三招,言女俠笑曰:「少俠讓了三招,禮儀足了!進招吧!」姸瓦一聲:「晚輩得罪了!」使出一些很普通嘅劍招,言女俠心想〝看來此女心術嚴謹教養極好,劍術還是普通吧!〞見姸女有一破綻,言女俠双劍左右一剌一削,眾豪傑正欲驚叫時,小姸瓦嘅傲然劍乘鳳凰两劍刺到,點在劍身上,〝叮叮〞两聲。「火鳳凰」連忙收劍,抱劍在手:「少俠留手,要是〝傲然〞點在我手上,我手必廢。」跟着長嘯一聲:「江山代有人才出,自古英雄出少年啊!」小姸瓦向「火鳳凰」深深一揖,紅着臉說:「姸瓦不懂事,冒犯了前輩,請前輩責難!」火鳳凰望着姸瓦,又愛又憐!



等一等,俾少少時間過百厭,講下百厭同「妍瓦」既因緣。話說「絕代」一文行篇幾回後,個副導兼美指(菊主)急件送嚟話有位女生想「試鏡」,雨中導演當然來之不拒,不久便收到女生的留言說:「女孩子愛美,可否給我一個美麗的名字?」那有多難!雨中導演就給本來為自己女兒起的名字,「妍瓦」給了這位女生。她知道了,再留言說:「我用了你女兒的名字,我便稱你為爹吧。」如是一叫三年多了,她就連亞爹都冇面俾、牙尖嘴利既百厭女嘞!



講起精彩,有好幾場的確係美哉妙哉!素心齋一役不論是武决文比頗為精彩、「吳係好棧」羣英陷困境、福水鎮衙前葉捕頭大戰鬼見愁、火燒客棧眾女戰羣奸、江邊殲日寇等等都值得再看。



百厭就「曳」還「曳」,原來都識寫愛情故事,咪好似江南女俠同寒春日、黑衣人同無艷姑娘、女楊過同余軍師,仲有就係菊嶼火同白也哲。秋葉亞E睇咗話百厭寫啲愛情古仔幾盞鬼喎,百厭咪話囉: 「百厭係過來人吖嘛! 」咭咭!



本來想為絕代双嬌寫一個完滿結局,如果話芃澎終於入宮為妃嬪甚至母儀天下,如此寫唔出女主角芃澎嘅氣質,亦係寫唔出百厭認識嘅彭彭之本來,百厭睇嚟,呢份係一個對朋友嘅一份尊重。話說回來,芃澎教訓黃衫客呢個皇帝老兒,條條道理、字字鏗鏘,服了吧!



寫過了「絕代」對百厭的確係個磨練,最長書寫曾經達十四小時,捱過不眠不休嘅晚上,係百厭一生中能想嘅範圍內都未有想過,竟然發生咗!亦為之後中篇「人在闌珊處」及「孤高城‧雨中家」兩部小說打好基礎。





好嘞!百厭功成身退,「絕代」行文七萬幾八萬字,足足寫壞三塊小蒙恬手寫板。塊手寫板中間花咗,不單寫起嚟唔暢順,而寫出嚟啲字就完全唔係你想要嗰啲,卒之要打本買一塊用感應書寫板面嘅新產品,經過幾年,鐵柱磨成針,終於又開始花痕處處.......


23 則留言:

五味軒 說...

五妹手工粗糙而帶有瑕疵的制作,大哥都肯不棄珍藏,應該是五妹感激大哥才對!

Unknown 說...

雨大哥
您好,青劍來請安了,先要謝 [絕代雙嬌] 故事網上結的緣,
近日忙於 fb 與各路英雄互訴 (激)(情),
一直盼大哥回來,很想知道對當地境況感受如何?
祝安好!

翠兒 說...

雖然是重溫,仍然回味無窮。
七萬幾八萬字!犀利呀!真係寫到手軟,諗下都怕怕。

秋葉 說...

五姑娘心思細密,親手為雨中兄製作出這部傑作的本子,真是難能可貴!
菊主當時為我們繪寫造型,真是妙筆生花!她為葉依秋繪畫的于素秋造型,形神俱備,維肖維妙!
她做企畫指點之餘,又被雨兄整頓為小兵兵,狼狽出場,真是互相百厭一番,故事娛樂性十足。謝過雨導的辛勞!

Stella Luk 說...

「教養極好」,,,,,飛仔咁兜個圈黎讚埋自己喎!咭咭咭咭咭咭咭咭咭咭!!!!!!!!!!

人在雨中淋 說...

這樣好的禮物,即使有點「瑕疵」,在友誼上一點也不重要。大哥珍惜的並非這些,而是將與各位博友、兄弟姊妹的緣,「珍藏」在心裏。

人在雨中淋 說...

妹子,這次回港,感觸良多,看香港事政發展,暴亂影響,社會老中青三代人在思考和立場上,意識形態的撕裂,各走極端,也直接應嚮每一個人,沒有人可以置身事外,還有人盲目的堅持下去,使裂縫越拓越大。
下篇吧!給妹子寫寫回港感受。

人在雨中淋 說...

翠兒,老雨又炒冷飯了,不過回讀「双嬌」的幾十篇,真是回味無窮。‧

人在雨中淋 說...

秋葉姨,就凴「双嬌」一文,使部份網友成了深友,這可以說是百厭一生的唯一「成就」。‧

人在雨中淋 說...

姸瓦的師傅是江南子「江大俠」,並非雨中先生,所以並冇教和養,要不百厭個女就唔會百厭過佢亞爹啦.....弊!百厭女咁耐都唔出現嘅?

秋葉 說...

雨中兄的成就並不止於此。。。

mayho 說...

雨兄:ok冇問題,我發咗個猫俾你,你看收不收到.

人在雨中淋 說...

收到了,已覆.....

人在雨中淋 說...

逗得老雨真歡喜!努力...‧

Unknown 說...

好彩我不是一根鐵柱, 否則......................鐵柱磨成針................給你磨死了. ; )
爹, 細細聲話你知, 我微信都係用妍瓦這名字. 咭咭
刪除

飛鳥 說...

雨兄
我是在絕代雙嬌時期結識你的
但我未有詳細睇過內交,實是抱歉啊!

五味軒 說...

大哥:發了個貓給你!

人在雨中淋 說...

亞爹沒有別的女兒,唯一只有你,妍瓦...‧

人在雨中淋 說...

你有沒有絕代雙嬌的合訂本,我可以電郵給你....

人在雨中淋 說...

收到了!謝謝通知。

red yellow 說...

現在看雨兄娓娓道來,
還是精彩萬分呢。

那時候,
yahoo blog,
天天妙趣橫生,
熱鬧非常。


人在雨中淋 說...

返港歸來到現時未忙完,待慢咗洪大俠潻,對唔住嘞!聖誕前夕,祝洪兄身體健康,安和自在,Merry X'mas!

Unknown 說...

那時大家天天都追看呢! 看大家有趣的討論也很快樂!