2014年4月16日星期三

絕代雙嬌 1 - 2



寫完了「孤高城‧雨中家」故事後,以為可以停一停,怎知夢想成真,真的要停下來!接二連三的家中瑣事,就弄到百厭暈頭轉向忙個不了。近日百厭不斷將以前雅虎殘文重新上載,主要係保持與大家一個聯系,想在五月中便塵埃落定,再向各位朋友交待一下,究竟為乜事。

繼「有生之年」及「我在鐵枝後的日子」後,有價值可以重刊的舊文,只有兩個,一個是費半年時間撰寫三十六集的「絕代雙嬌吔烏城冰火對決」及十集的「人在闌珊處」。後者要徵得當事人網友懿如女士同意才敢重新上載,所以先將「絕代雙嬌」一文放在前。



絕代
文章日期:06/05/2012 12:37 am





絕代双嬌「吔烏城」冰火對決
第一回 鎮城寶秘笈被盜 僧尼手下出高徒

「吔烏城」乃茫茫網誌宇宙間之一小市集,勿看小這方圓數十里「吔烏」,城中卧虎藏龍,撞口面能是高手;賣豬肉者可能是「千刀一斬」屠豕,挑夫者或許是「天下一個挑」挑也麽。所謂真人不露相,名家出手方知「有沒有」。 


近日城中熱傳两女俠;「妙韻冰音」芃澎與「嶼火島島主」菊無艶相約,來一塲「冰火對决」,切磋切磋………


事緣「吔烏城」二十年前發生過一大事,鎮城之寶【朋友秘笈】被盜,此乃「落雨劏雞客」雨中淋所為;此人形相猥瑣,行藏鬼異。隨後「劏雞客」逃避城中名捕「秋飛一葉」葉依秋追緝,挾笈逃往西域。




「劏雞客」抵西域,百思不解,何緣整部秘笈洋洋數十餘頁,只有中頁得一〝誠〞字。良久「落雨劏雞客」之名在「吔烏城」經已無多人知曉,「劏雞客」對着【朋友秘笈】上的〝誠〞字,二十多年苦思苦想,略有所悟,所謂「相從心生」事隔二十多年後,「劏雞客」相變氣宇不凡,光明磊落,好個雨中淋雨大俠。


鳥倦知還,雨大俠欲歸還【朋友祕笈】給「吔烏城」城主「吔烏大俠」洪湟。以前鼠竊狗偷的「劏雞客」於吔烏洪湟大俠眼皮底下盜去秘笈,今日揚名西域之雨大俠要將之歸還,一個曾偷、一個被偷;洪、雨两人何等丟臉。雨大俠遂請教大師一憂,如何得以双贏。


剛在異邦闡揚佛法之一憂大師,剛拜會西域雲尼,見雨大俠到來陳述秘笈事,一憂與雲尼皆說:「我等皆有一徒,資質聰明、行動俐落,交她們辦應萬無一失。」


一憂大師徒兒是「嶼火島島主」菊無艶,本來僧不納女眾為徒,惟因菊無艶雖生女兒相貌,性格火脾氣硬頸男仔頭。西域雲尼徒兒乃「妙韻冰音」芃澎。芃女俠本非練武之材,巧遇高人;西域雲尼見此小妮子有極悅耳動聽好嗓子,故收於門下,授「妙韻冰音」功。两名師出两高徒,两女俠當然名震「吔烏城」。


筆者的話﹕
幾年前百厭回港,有機會與網友彭彭和菊主約會事,三人後來來在網上發表了當日所發生的趣事,文章不單寫得好!回應亦熱烈搞笑非常。雨中淋一時手痕心癢,妨且文中有我,故揮筆寫個搞笑版【絕代双嬌「吔烏城」冰火對决】


故事全屬虛構,用語可能畧粗俗,所謂「雅俗共賞」。如上面說「文中有我」,亦想文中有你,所以會將你〝擺上枱〞,以多謝你常常來這沓無人烟寒博。在第一回的博友現身,包括「秋飛一葉」葉依秋(秋葉阿姨)、「吔烏大俠」洪湟(Red_Yellow)、「一憂大師」(一休)、「西域雲尼」(CT Winnie)、當然還有双嬌「妙韻冰音」芃澎(彭彭)和「嶼火島島主」菊無艶(菊主)。唔記得介紹我呢個「落雨劏雞客」雨中淋雨大俠添!


唔好介意為你地改晒「花名」,往後會出現嘅博友是;十二月、甜夢、五味軒、Ms A MaggieBoBo同遠居澳洲的Nonna,如果百厭星雨中淋唔記得你,而你又想出現喺「吔烏城」嘅話,請你話個我知。你想知佢地個「吔烏」名,下回再續




絕代双嬌 2
文章日期:06/08/2012 03:51 am






剛送咗〝上大人〞上班;枱上一杯香濃咖啡,執起筆桿,繼續與您共同創作呢個「吔烏」武俠小說。收到您地嘅回應,有好多本來喺心目中嘅橋段要重新安排,同埋故事會長咗好多。呢樣除咗係「市塲」(有您同有我)需要,最重要嘅係大家都係主角,大家都有份,您地嘅建議同新撟,梗係要寫埋落去啦。

第一回係試用「文言」嚟寫,因為水平有限,寫得好吃力,您地睇嘅又辛苦;所以由第二回開始,改番用「白話」,鄉土情嘛!

閒話休提,言歸正傳。



絕代双驕「吔烏城」冰火對决
第二回 雨中淋西域還書  嶼火島沙丘尋菊 


往嶼火島街渡,小小嘅船擠滿滿嘅商貨同販夫走卒。雨中淋獨自坐船尾,沉思一憂大師、西域雲尼交帶嘅說話;一憂大師話:「我呢個不肖徒兒鬼靈精怪、刁蠻任性。雖然係女兒身,精通易容,經常作男兒打扮。就係因為佢男仔頭,乜事都去理,事事出頭,受島民愛載,所以暱稱之為「島主」。雨大俠到咗嶼火島,事旦問人都知道我徒兒住處。老納經已將畢生所學,盡傳授俾佢,佢只係有一樣佢唔肯學就係佛經!不過,話咁講啫,我最疼〝錫〞都係佢。」「不單如此,呢個丫頭喺「吔烏城」都好出名,因為佢係城主洪湟大俠嘅乾女兒,還書事可說是萬無一失,唯一所怕係佢脾氣火爆……」西域雲尼即接上說:「所以……我徒兒「妙韻冰音」,處事沉着穩重、精明能幹、謙卑內斂,如冰一块,深藏不露,有我徒輔以而行,應無所失。」


雨中淋諗到呢度,不禁好笑,呢两個世姪女竟然一火一冰。正在此刻,船家喝一聲:「客官坐穩,開船嘞!」語剛落下,埗頭那邊一聲「請等等!」三個人影飛身上渡。


第一個落在船側,船不搖不晃,好俊嘅輕功,此人帽子上有一翎羽,睇嚟係個捕快。冇錯,佢就係名捕「揪飛一葉」葉依秋。其餘两人亦落喺前舷,船首往前沉甸一下,功夫係有,不過未夠火侯。佢地一件事就非常了得,係人都知佢地係捕快。



神州大地無奇不有,既是便衣,又點解要俾人知係便衣呢?


葉捕頭虎目一瞪,〝掘〞住两個不成材又慌死人唔知嘅手下,再橫掃船上商販各人,目光射喺雨中淋面上。心想:「此人好面熟,睇佢武功若有若冇,深不可測。」當然啦,一別二十年,大俠音容亦改變咗,梗係唔認得啦。雨中淋俾葉捕頭眼神盯住,眼波傳熱量,很不好受。施施然回望一眼;二十多年喺「朋友秘笈」所領悟,由眼神傳出,與葉捕頭眼波接觸,化戾氣為祥和。「揪飛一葉」拱手說:「慚愧慚愧!好深嘅內功,佩服佩服!兄台係……」語未完,船首两個〝便衣警察〞大嚷:「菊無艶!」


說時遲那時快,一個人影從船中似電光火石飛出,從江中街渡飛射到彼岸。「菊無艶」?可以話係女兒家名字,但係人影半點都冇女兒家姿態身形。咁究竟「菊無艶」係何許人也?


「揪飛一葉」輕功雖然了得,比「菊無艶」還遜一籌,嗰两個酒囊飯袋嘅「便衣警察」更加不濟。捕頭:「兄弟們企穩!」〝刷、刷、刷〞射出三支葉鏢,葉捕頭一彈而出,踏飛鏢借力躍到對岸,雨中淋心中叫好!果然是名捕,若二十年前唔走佬去西域,一定會俾佢捉着。其他两捕快,一個冇跳到、呆若木雞〝企穩〞喺船頭,另一個踩唔中支葉鏢趺咗落江,〝企穩〞變咗落湯雞。捉唔捉倒「菊無艶」?您話呢?


雨中淋登上嶼火島,好容易就問明白「嶼火島島主」住處,往前走過沙丘,東蘺滿種菊花小屋就係嘞。大俠朝沙丘走,四顧漁村風光,見迎面而嚟一男一女;男者健碩如牛,起碼有二三百斤,女者嬌少玲瓏,身段之美,似月上嫦娥。佢地有兩個特別,一者;均東瀛打扮、二者;脚步在沙丘上不留痕跡。

來者何人?是两兄妹、東瀛人仕也。哥哥是「東灜十二郎」辛月十二,妹妹是「花子姑娘」辛月花子。緣何兄妹倆在此,且在下回細說。


故事另一端;「妙韻冰音」閒來無事,整理醫箱。芃女俠不單「妙韻冰音」能碎磚瓦,佢嘅藥石病理亦相當高明。女俠常穿夜行衣帶醫藥,潛入大牢為失醫囚犯治病,被救囚徒暱稱她為「獄中仙子」。


剛收拾好,天上跌下一隻信鴿,細看之下原來係佢師父西域雲尼,放呢隻信鴿帶信俾佢。由西域千里迢迢飛嚟,隻信鴿攰到頂唔順,到終點就硬着陸。芃女二話不說,〝拍〞咗粒丸俾隻信鴿,(對唔住!嗰陣時唔興用個〝拍〞字)救番佢一命。

芃女俠睇清楚信中「內容」,回書两個字「遵命」。



絕代双嬌 (預告)
文章日期:06/12/2012 02:45 pm




呢两星期會比較忙,因為要協助加拿大防癌協會每年一次嘅 Cops for Cancer活動,(如果有興趣知道呢個活動,可以點擊網誌上嘅Cops for Cancer系列同Cops for cancerVideo,呢啲錄影都係我拍攝同剪輯)星期四係第一次練習。下星期我要接受一項「全麻」牙科手術,(好大陣仗)緊係細個嗰時講得大話多。係呀!我認喎……如果唔係點會依家仲喺度寫「大話西遊」唧!


趁有啲時間,依家就敲定「吔烏」古仔嘅橋段,同埋其他網友喺故事中嘅吔烏名字、扮演嘅角色同專長。咁啱有两位男士加入,就委屈佢地做奸嘅,去害人害物。其他未出塲嘅主角都會喺下两回出現,素心齋樓頭成為英雄之會,好希望有日此景能成真!


下两回出現嘅主角除咗出現過嘅;「妙韻冰音」芃澎(彭彭)、「嶼火島島主」菊無艶(菊主)、「一憂大師」(一休)、「西域雲尼」(CT Winnie)、「東瀛十二郎」辛月十二(十二月)、「東瀛花子」花子姑娘(Ms A)、「揪飛一葉」葉依秋(秋葉亞姨)、「中原一點窮」窮瘋婁(中原一點窮),仲有〝一身儒生打扮、羽扇綸布〞嘅「落雨劏雞客」雨中淋大俠(雨中淋)之外,會相繼出現嘅其他主角有;「雲端影」步輕雲(BoBo)、「厨癡」五大姐(五味軒)、「南疆青劍」娜拉(Nonna)、「夢仙子」如夢姑娘(甜夢)、「塞外箭羽」瑪姬(Maggie)、「吔烏大俠」洪湟(Red_Yellow)大俠出塲迎戰「天下極貪」真特醜同佢足智多謀嘅師爺「瞧余奸毒」余樞基(ck)與及武功强橫、劍過不留痕嘅「了斷無痕」寒春日(春日鳥)。



先賣個關子,等您地心急下,我都好心急!




30 則留言:

Unknown 說...
此留言已被作者移除。
Unknown 說...




嘉芙的角落2014年4月17日 上午2:00

好歌不怕百回聽, 好文不怕百回聞. 復活節快樂!!!!!!!!!!!!!

秋葉 說...

雨大俠::謝謝你!讓我「秋飛一葉」又來了!有網友竟說我是「小李飛刀」,例不虛發。
這都是拜閣下所造就了。再謝編導!

Stella Luk 說...

炒冷飯好好味,預埋我,唔該飛仔!

wei-wei 說...

Stella 說你炒冷飯, 但我未看過, 便當是新作, 我會用心欣賞。

Unknown 說...

想不到能看到出名的"絕代雙嬌"!!!
雨大俠竟然一出場就"形相猥瑣", 跟孤高城的酒鬼雨大俠一樣, 稱不上大俠! 好在唔駛兩句就變回"氣宇不凡", 變身得超快呀! :D

Unknown 說...

百厭星你好.
祝┏┯┓┏┯┓┏┯┓┏┯┓┏┯┓
福┨復┠┨活┨┨節┨┠快┨┠樂┨
您┗┷┛┗┷┛┗┷┛┗┷┛┗┷┛✿░✿ܓ(。◠‿◠。)♪♫ ✫❤ ❤ ♪♫

蒲公英 說...

魚兒大佬駕臨,有失遠迎,恕罪恕罪。我代大哥請罪。嗱,大哥,你有香濃咖啡,記得預埋我一份。祝兩位復活節快樂!

Unknown 說...

蒲公英..復活節快樂..
當然有你份..請飲香噴噴熱茶~◥██~ ◥██~(。◠‿◠。)♪♫哈哈..

五味軒 說...

你寫足半年,大家追足半年!一看再看!懷念惜日的時光!

Stella Luk 說...

新鮮飯都未嘗試,而家黎吃炒冷飯。

人在雨中淋 說...

好歌都會聽厭啦,好文睇一兩次就可以,如果要睇百回,咁就差唔多背書咁,咪搞!
祝乖女復活節快樂!

人在雨中淋 說...

秋飛一葉嚟緝拿劏雞客呀,快走!
係亞姨形像好似,所以有咁嘅効果,其實與百厭筆下只有叮叮咁多關系,不用謝也!

人在雨中淋 說...

炒冷飯係名菜,拎得出嚟見人經已了不得,仲要人家食得落肚,咁必屬佳品啦.... 百厭講緊炒冷飯,唔係上面嗰篇殘文,要宗姊啃冷飯真過意唔去嘞!

人在雨中淋 說...

新鮮飯係白飯,炒冷飯都係白飯,不過宗姊知唔知真正嘅楊州炒飯係用新鮮飯攤凍之後,要嚟炒先至粒粒分明嘅呢?
百厭諗炒飯同殘文都有一定嘅價值,依家讀唐詩三百首,咪係以前嘅新鮮飯...依家嘅炒冷飯....宗姊呵。

人在雨中淋 說...

古龍嘅絕代雙驕同百厭嘅絕代雙嬌一比之下,百厭立即相形見絀。
雨大俠出身卑微,所以做鼠竊狗偷,同孤高城個酒鬼出身富裕畧有分別。

人在雨中淋 說...

多謝細妹同大哥招呼魚兒大佬到,飲乜野盡管開聲,自己攞就得嘞,記得埋埋張單喎...

人在雨中淋 說...

五姐,嗰半年間認識咗好多新朋友,隨着時間事物變遷,彭彭、菊主、春日鳥、一休、CT Winnie、中原一點窮、Nonna、甜夢、Maggie、CK...有因雅虎結束、有因意興闌珊而封筆,有因失去聯絡,很唏噓。只要緣還在......

秋葉 說...

唔使噉驚青!上月有位網友竟然還記得我是”葉捕頭”,就說:”葉捕頭寫的詩,正如”小李飛刀”,例不虛發。”
不知是褒是貶了?但也可見得你當年寫的故事,已深入人心。

蒲公英 說...

不是嗎?大哥,飲你枱上的一杯香濃咖啡,也要我找數!@_@

人在雨中淋 說...

非也,是葉捕頭功力深厚,老雨只不過是旁邊綠葉而已。

秋葉 說...

小女子何德何能?其實雨大導才是靈魂舵手!我不過是一隻棋子演員吧了。

人在雨中淋 說...

果然是”小李飛刀”,例不虛發。” 點正老雨喜穴!咭咭!

秋葉 說...

語不虛妄,是為不虛發。咭咭!

五味軒 說...

百厭:五姐都係好易想當年,容易感觸的人,真的很懷念當時情!大家吱吱喳喳,尤其係鬼主意特別多的菊主!現在人去樓空,怎不唏噓!

人在雨中淋 說...

還不是嗎?老雨輸了!咭咭!

人在雨中淋 說...

緣起緣滅,但老雨仍相信緣還在。

人在雨中淋 說...

快啲嗱嗱聲找數,咪講咁多!

凌子卉 說...

認識百厭日子淺,追溯起來是在菊主屋簷下相遇,時移世易,村姑退隱了,不見蹤影。
「人在闌珊處」這篇感人的紀實故事。深深印證了人生的不幸,造就了堅強的心,要不是同病相憐,感同身受,寫不出這麼感人的故事。我含笑著看,熱淚盈眶;我也淚著看,事緣雖然故事不同,遭遇雷同。
人生旅程凡幾十年,很短暫,往往受到健康的威脅,看得化也好,看不化也罷,把每一天當是自身賺來的每一天。
百厭,人之消失,不必牽掛,有幸認識一場。
記著,相識一場,幾年之後,也成了將來的想當年,很榮幸,認識您。

人在雨中淋 說...

嘩!咁長....百厭唔過番咁上下長,點頂得住...應該話點對得起一叔呢!
話說當年無情情有個一粟闖入寒博,百厭一時百厭起嚟為佢改成一叔,攪到雄雌不辨,啼笑皆非,好彩,一粟冇怪百厭曳曳,呢份友情得以開始,咁就幾年了。
以前久不久百厭會去一叔處搭下咀,點知佢啲詩詞越嚟越深,每日都有出品,百厭咪跟唔上囉,仲有佢煮啲野又唔啱食......
百厭只不是個糟老頭,小人物,不用說榮幸,只要緣還在.....