2014年4月30日 星期三

絕代双嬌 8



絕代双嬌 8
文章日期:07/04/2012 12:29 pm






絕代双嬌「吔烏城」冰火對决
第八回 朋友秘笈成灰燼 双嬌追尋不解謎


第六回完結前,唔知大家有冇留意、百厭星留低咗一條令人唔察覺嘅〝伏線〞,暗示呢個吔烏古仔冇咁快完:「雨中淋從懷中取出一本殘破不堪嘅本子,上面寫着「朋友秘笈」四個大字,羣雄終於看到其真貌,字寫得好像小孩子寫大字歪倒不正,裡面幾十頁紙,只有其中一頁寫了一個「誠」字,和旁邊有幾點墨印。」



仲未睇倒?冇錯嘞,就係最後「旁邊有幾點墨印」嗰句,點解最尾要提呢幾點墨印?因為呢個係不解之謎。而家講番轉頭,唔單止您地都想知,各大俠、各路英雄豪傑,甚至對住呢部秘笈二十幾年嘅雨中淋大俠亦百思不得其解。百厭星知唔知?您話呢?




將個古仔講番轉頭,接住第六回末端;

雨中淋將之放桌上,洪大俠正欲拿起,廚中走出「廚獃」,喃喃自語說:「成個廚房揾張紙〝透〞火都冇!」見桌上一叠「癈紙」就順手攞咗入廚房。呢個時候冇人再在乎了!畢竟雨中淋大俠有啲唏噓,其一、呢本秘笈廿幾年一直喺佢身邊。其二、佢本意係要親手交番俾洪湟大俠,點知中途殺出個程咬金,拎咗秘笈入廚房〝透火〞。其三、雨大俠將呢本秘笈睇咗不下數萬次,似乎有所悟,所悟者能使自己有所變,但又覺得所悟所變嘅亦不過如是。究竟秘笈中係唔係尚有不解之謎呢?



呢個時候,廚癡用鑊鏟打嚮仍然掛喺胸前嘅黑鑊,〝押〞住五大爺喺廚房行出嚟,語帶解嘲咁講:「我家老頭真厲害,三脚貓功夫都唔會,竟然喺各大高手面前一手〝擸〞咗本秘笈入廚房,我又順手一接塞咗入灶頭,燒咗囉!」



洪湟大俠見雨中淋面上畧帶黯然之色,說:「賢弟,莫再為愚兄年小時貪得意買嘅〝秘笈〞起煩憂。」「嚟!今日大眾有緣於素心齋,五大姐,有乜好點心齋菜,盡管攞出嚟。」五大姐敲一敲頭上個瓦煲,行咗一個花旦下揖拜禮,唱道:「請客官稍等,點心齋菜隨後即上!」



唔好睇小呢位最近被譽為「廚癡上咗身」嘅五大姐,佢嗱嗱聲就整咗幾個精美嘅點心: 金盞銀盆、 素心癡、心花放、素菜餡餅。精美小菜有五色爭輝、醬茄子、南乳炆齋同芝士焗鴛鴦飯。紀思磬同紀爾雅兩個真係兄弟情深,總係將最後個件食完至推隻空碟俾對方。菊無艶好彩係男装打扮,唔係就真失禮嘞!見佢两手左執一件金盞銀盆、右執一塊素菜餡餅,個口〝担〞住舊素心癡,對眼「哨」住碟上嘅心花放…… 旁邊嘅窮瘋婁見咁,佢摸摸下巴,好迷惑!因為兩年幾嚟未見過無艶姑娘咁嘅!



芃澎坐喺席中、如果百厭星唔提起,根本沒有人會留意她同「花前」「月下」靜靜地品嘗廚癡嘅絕頂佳肴。四秀其一女俠,端一片素心癡到「了斷無痕」寒春日面前放下,轉身回到江南大俠身旁。文折桂望着這徒兒點了點頭。


持素嘅其中一個意義係「慈心不殺」,「不殺」乃學佛者〝殺盜淫妄酒〞五戒之首,所以因學佛而持素者多不喝酒。羣雄沾腥葷者多,大家雖以茶代酒,但吃喝痛快。芃澎領「花前」「月下」入廚房,良久、葉捕頭本欲離開,見三女為眾人端出一碗碗熱熱嘅薑汁檸檬百花露,捕頭取了一碗,好漢子牛飲一口,方知是個浪費,坐將下來細細品嘗。


天下無不散之筵席;離開素心齋前,雨中淋與洪湟、一憂、雲尼等幾位講及秘笈:精通舊事古蹟嘅「四脚蛇」嚴卸話據佢所知,中土、西域、東沿、南疆、北境都未曾有過一本叫「朋友」嘅秘笈,可能呢部〝秘笈〞真確係江湖術士騙財手法,但係雨中淋始終覺得係有一個秘密。嚴卸補充咁話:「講起嚟係有啲特別,秘笈上面啲字體寫得好似細路仔寫大字歪倒不正,但係又似有功力嘅人所寫,應該話唔係用筆寫,而係用功力潑墨而成。呢種字體同潑墨方法,我喺中土東沿見過,相傳有能人喺山間潑墨成字於巖石上,後人刻之留於現世。」



一憂大師接着:「嚴施主提醒我矣!老納識一位東瀛僧人,見識過呢門內功,而呢位僧人東瀛住處與嚴施主講嘅東沿之地只一海相隔。」這時在旁嘅菊芃二人携着手走上前,好有禮貌向長輩同師父行禮;呢次係芃澎盈盈下拜,無艶姑娘怕招人笑話,行咗一個男子漢抱拳拱手之禮。「師父,這事就交我們辦吧!」



西域雲尼同一憂大師嘅想法同最初雨中淋拜會時一樣:「我等皆有一徒,資質聰明、行動俐落,交她們辦應萬無一失。」如事者,三日之後菊無艶與「悲心使」天使姑娘、「小師妹」姸瓦姑娘往中土東沿。臨行前,葉捕頭趕至對送行嘅洪雨等大俠說要一齊同往,一憂大師合十說曰:「此次到東沿三位皆為女生,老納想捕頭欲同往,恐有不便吧!」此時菊無艶笑得〝人仰馬翻〞嘻嘻的說:「捕頭係無艶易男服嘅老祖宗,乾爹、師父!不用怕,無艶早就知葉捕頭是女的。哈哈哈哈!」〝揪飛一葉〞葉依秋脫去帶翔帽子,頭髮一丟,一把長長黑髮,現在各人面前。


芃澎和「花前」木蘭姑娘、「月下」月兒姑娘,由「東瀛花子」花子姑娘做嚮道遠赴東瀛……相約两月後與眾英雄豪傑再會素心齋。




後語:寫過第七回後想了很久!包括您地在內,都唔想呢個吔烏故事咁快完疍!亦唔想單單喺最後两三回獨看冰火两女比拼,大家都想延續呢份網絡上嘅友誼同緣份,所以……百厭星推翻本來已敲定嘅第八第九两回,重新再鋪排過一個新嘅情節,滿足大家嘅期望。

先係讓亞姨回復女兒身,(您地冇發覺〝葉依秋〞呢個名有啲女人味咩?)好讓佢能與無艶姑娘到東沿,後嘅係百厭星安排咗博主雨中淋一身演两角,反串做潑辣邪惡嘅汝莫愁,百厭星諗:「呢個位如果雨中淋唔做都冇人肯做嘞,咁你就啃咗佢啦!」汝莫愁有個帮手,百厭星諗緊一位,〝新嚟新豬肉〞嘅「湖雪」網友,佢話有得玩,佢扮G都做喎!咁百厭星係曳啫,都唔會寫人要做G嘅,奸角已經好難做嘅嘞,出街要遮遮掩掩,公眾塲所要載頭笠……呢两位女奸徒係「鬼見愁」汝莫愁(雨中淋反串)同「雪中妖狐」令狐雪(湖雪)。下一回見!




2014年4月28日 星期一

絕代双嬌 7


絕代双嬌 7
文章日期:06/29/2012 04:11 am



記得當年上載「絕代雙嬌」一文,到第六回完結,百厭與大家開咗個玩笑,攪咗個「吔烏城慶祝會」,將所有参與網友名字刊出鳴謝,放出一個烟幕話絕代一文就喺「素心齋」一戰就結束。攪到啲好朋友唏噓不已..... 嘆說「乜咁快就冇得玩。」連菊主都唔知百厭嘅陰謀詭計,幫手嘈埋一分,不過背後,百厭經已步署好第七回,第八、九....


第六回收筆後收到回應唔太多,可能大家都睇「攰」咗!不過;收到呢幾個回應,我用嚟做一個開場白:

Ms A Jun 23, 2012 1:24 Am
我來了兩次,看了兩次...真唔相信咁快game over....失落啊~~~

彭彭
 Jun 24, 2012 1:47 PM
吓! 咁就完場???
敢問導演,重頭戲兩女角「冰火對決」一場在那?

彭彭
 Jun 24, 2012 1:59 PM
「冰火」都未有「對決」,豈能結束!
菊主自薦當美術指導,彭彭還想自薦撈番個音樂總監添!可惜太遲。


百厭星立即答曰:
雨中淋  Jun 25, 2012 12:09 PM
彭、您心水清,但別問最終回「冰火對决」事,看以下我與菊往返回應便明白。




菊主  Jun 18, 2012 10:18 AM
師兄:兩女主腳不能太閒,菊主在中間加了兩場戲:

雨中淋
 Jun 18, 2012 12:23 AM
菊:我唔想喺這两回在芃菊兩女着墨大多嘅原因係……呢两回係以各博友客串主角為主要,各領風騷。好讓人人有份,開開心心,結個善緣,所以連我呢個雨中淋都靠邊站。另一個原因係帶讀者去最終回,呢個先至係整個吔烏古仔嘅高潮「冰火對決」。大家都會以為素心齋一役完咗就曲終人散,意興闌珊之時,點知仲有最過癮嘅「双驕、双嬌」對决,只係有無艶同芃澎两人,各出其謀,笑坏肚皮,嗰時先至係焦點着墨之處。



雨中淋
 Jun 23, 2012 2:03 AM
菊,唔好提還有「冰火對决」下文,(我曾給你电郵?回應有關安排,可能您沒有收到)並將上面『另一個原因係帶讀者去最終回,呢個先至係整個吔烏古仔嘅高潮:「冰火對決」!』呢句删除,用另一句代替;而家連Ms A咁精ling嘅都未發覺會有最終回:「冰火對決」,覺得好失落。記得只有一位講過知道有下文(23吋),應該在本篇回應內!在其他未知之前......快快快

菊主 Jun 23, 2012 3:41 AM
師兄:已刪冰火,好忙!今日趕幾場!稍後再補充第6回讀書報告;真係寫得好鬼正可否先給菊主看笫七回?



雨中淋
 Jun 23, 2012 6:25 PM
安排畧作改動!第七回星期二 (香港星期三早上八時前電傳給您,讓您先看,您有足夠時間準備圖片?!初稿尚未敲定,要睇晒您地啲古靈精怪嘅回應至落筆。也可以使呢個古仔「降温」,六月三十日星期六(香港星期日早上八時前)才上架!
您看如何!


嗱!就係咁;其實雨中淋喺第五回未發表前,嗰個傻瓜菊主嫌自己同彭彭唔夠戲份、話要加料两段嗰時,經已步署咗同大家開呢個玩笑。仲有嗰個心水咁清嘅芃澎,離譜到直情用質問口脗:『「冰火」都未有「對決」,豈能結束!』跟住拍晒檯咁話:『敢問導演,重頭戲兩女角「冰火對決」一場在那
』,那知雨中淋經已〝忍辱負重〞安排咗佢两個喺最終回打餐飽嘅,咭咭!


我知道您地咁聰明,點會唔存有呢個疑問:『明明講咗係「絕代双嬌吔烏城冰火對决」,而第四回「冰音嶼火初對决 素心齋樓會厨癡」都只不過提過「初對决」,咁……嗰篇最終嘅「冰火對决」呢?』大家都好俾面雨中淋呢個糟老頭,唔會開聲鬧佢、掟番茄同雞疍(彭彭係唯一例外,菊姑村呢個男仔頭更加唔駛講添啦)。雨中淋百厭星經已做足功夫,喺大家都以為素心齋一役完咗就曲終人散,意興闌珊之時,為您地繼續寫埋呢個搞笑嘅古仔。因為呢個最終回(可能會分七、八同第九回)淨係得菊無艶同芃澎两位對決,各位英雄豪傑、鄉親父老唔該担定櫈仔,霸個好位……手脚無眼,坐後小小,唔該!……(噓!吊頸都要抖下氣吖,大佬!呢次寫慢啲,您地唔駛睇得咁辛苦。)





絕代双嬌「吔烏城」冰火對决
第七回 古道熱腸說嶼火 外剛內柔話冰音

『話說吔烏城經過素心齋樓頭一役之後,難得相見嘅都能夠藉此一敍。以下嘅兩位、「嶼火」同「冰音」更加不在話下。佢地其實早两年前經已相識,但總安排唔到時間見面,咁啱嗰個雨中淋大俠話有本武林秘笈要還番俾吔烏大俠洪湟,憑「冰」「火」两位嘅師父雲尼同一憂推薦,咁雨中淋就成就咗佢两位相見嘅機會嘞。



咁究竟喺呢篇吔烏古仔之中,呢两位女俠喺導演、編劇、監制……呢個百厭星筆下喺何許人也?古仔裡面同現實生活係點嘅呢?呢啲……咁諸事八掛嘅您地一定想知!咭咭!
好!百厭星就一於唔話過您知,因為佢都唔知。百厭星只可以憑佢日常同佢两女俠嘅書信往來…咭咭(做乜笑得咁鬼奸唧!)加埋去刨佢地啲博落客同〝飛仆〞,同埋佢地嗰啲無厘頭古靈精怪嘅回應,綜合分析,抽絲剝繭嚟塑做佢两位絕代双嬌嘅形像,好高難度架。


先說嶼火:


女仔好鍾意人地讚佢靚、菊主(嶼火)佢特別啲;有次百厭星「錯口」讚讚,卒之俾佢鬧咗百厭星三頁紙。點解,一個成日諗住自己係男仔嘅女仔又會靚得去邊吖?不過,佢又例外(嗱!大家做証,百厭星冇講過佢靚抑或唔靚呀!)唔單係咁,連「冰音」喺百厭星未見「嶼火」前,同百厭星講嶼火佢「清雅脫俗」,呢個係嶼火外表嘅形象,但係佢心目中係鍾意整鬼人家,所以佢滿腦子鬼主意,弄到人地哭笑不得為大快之事。嶼火有時同百厭星講,話佢自己係錯配女兒身嘅男仔頭,鍾意路見不平、拔鏟相助(咁最啱做泥工)。呢樣一啲都冇錯;嶼火島嘅狗C垃圾佢都理埋,啲牛吽放低幾両,佢去插朶花影張相,通知島民唔好踩親嗰〝篤〞……久不久又同木蘭姑娘呢班益朋損友去通島走,四處堪察,睇吓有冇人偷鐵偷電線偷渠蓋,保碍嶼火島安寧。唔單止咁喎,佢成日話要保衛嶼火島領土,喺籃球塲力拒「外敵入侵」,話乜野「小村姑力敵城市牛、嶼火鄉下妹 VS 大島城市男」話:「咱們都係既野且狼嘅鄉下妹;是以往往均能擊敗過江龍,保住嶼火牛嘅蠻名,對得住嶼火島嘅叔伯兄弟姨媽姑姐。」仲話要維護靚女尊嚴,用事實証明「籃球塲上冇美女」呢個講法係錯嘅!最近喺扒大艇節日、嶼火島賀誕同慶祝七一大島做龜十五年,幫手做呢樣做嗰樣,忙到自己擦損手扭傷脚、唔夠瞓同得番半條人命。
呢個就係嶼火現實生活嘅形象,喺百厭星筆下,當然唔能夠埋沒佢呢啲咁「脫俗」嘅特性啦,可能仲會輕輕咁加重料添,咭咭!



後話冰音:
女仔好鍾意人地讚佢靚、您鍾意還鍾意,百厭星就偏偏唔讚,留番各位自己去彭彭「冰音」個網誌,嗰度有大大張東瀛游嘅相喺度,(係嗰個靚女,唔係嗰個蒙面咸蛋超人喎!敝,漏咗口風添)。百厭星第一次接觸「妙韻冰音」,嘩!聽佢把聲,百厭星窮盡「生鏽謬筆」都唔能夠刻劃出嚟,唔單止我咁講,連男仔頭菊主都咁講:「其聲線亦如電話中那麼動聽 , 溫婉如舊時的電台女主持 ,聆聽她說話也是一種享受;飽餐後靜聽會有催眠之效…… 如午后灑過的一場春雨舒心得直想眠一眠……」 咁明明把聲好聽,點解又俾百厭星冠以「冰音」呢?


彭彭俾百厭星嘅印象係外剛內柔,所以為佢寫咗個吔烏古仔嘅形象,由佢師傅「雲尼」講出嚟:「我徒兒『妙韻冰音』,處事沉着穩重、精明能幹、謙卑內斂,如冰一块,深藏不露,有我徒輔以而行,應無所失。」佢之所以「冰音」能有殺傷力,就因為佢言詞厲害,一語中的!連百厭星都唔放過……百厭星領教過嘞:事緣係有幾樽藥物千里迢迢帶俾佢,百厭星携最簡單行裝〝質〞滿一喼返大島,見面時喺背包攞出幾樽藥物,「妙韻」見到散收收幾撙野,悻悻然喺佢個手袋攞出一個環保袋說:「好彩我有準備!」然後〝掘〞咗百厭星一眼〝冰音〞一出:「男人喎!」三個字攞命!百厭星寄居人地屋企,去邊度摷個環保袋俾您呀姐姊!



百厭星最佩服呢位女俠,〝妙韻〞為在囚人仕做善工經己多年,係佢所寫自心間嘅說話:「感謝天主給我的一切,並揀選了我行監獄善工。農曆年後又是新一個課程,我會繼續努力。」履行咗一位天使嘅使命。




再話說「嶼火冰音」:
睇完第四回,花子姑娘話:「最後兩朵玫瑰塞在那呀?雨大俠真係鐵俠柔情啊!」跟住菊無艶搶答:「呢幕戲是真的! 」一向胸懷狹窄小氣鬼百厭星一睇就扯晒火,講:「唔講尤是可、講起把幾火!〝玫瑰的故事〞係真嘅,而嗰一段對白都係真嘅!「玫瑰」仲有下文,我俾佢两個激死,我諗佢两個都唔得佢地自己講過乜,真嬲、下回會口誅筆伐至得。」菊無艶當堂打個突,即刻問:「咱們說過了甚麼 ? 


佢地緊係唔記得啦!您地諗吓:「百厭星一個百爺公無啦啦揸住两支玫瑰花,搭船搭車喺條街度行,唔理人地點睇、人地可能諗:『慳啲啦,伯〝虎〞!睇吓你副尊容,嗰把年紀仲揸住两支紅色玫瑰花,唔係話我知去……呀嘛』」,人地點諗冇所謂,當百厭星親手向两位献上紅色玫瑰,佢地嘅驚訝同感激過咗之後,两女異口同聲講:「百厭師兄都冇睇我地寫嗰啲野,我地唔係咁鍾意玫瑰,我地鍾意鬱金香!」「鬱金香?gosh!


好囉!今次可以大報復,百厭星「主塲」兼且屠筆在手………咭咭




2014年4月24日 星期四

絕代双嬌 6



「絕代双嬌」首篇自201265日起到本文,2012622日、半月間已上載咗六回(七篇),平均每篇字近二千五百字,而這第六回係最長嘅一篇,共五千三百九十四字,費十四小時完成。



絕代双嬌 6
文章日期:06/22/2012 03:36 pm






絕代双嬌「吔烏城」冰火對决
第六回  短兵相接在眉睫 大俠一語解干戈


上回說到東瀛十二郎同花子姑娘擲人後硬闖素心齋、厨癡胸背掛黑鑊頭戴瓦煲從厨間走出

五大姐由厨內走出,左手執刴菜板刀、右手持素心情長劍,胸背各掛一黑鑊,頭頂戴個瓦煲;走碎步,如花旦小武出塲,唱白:「呔!何許人敢在素心齋樓頭撒野!」,站在席中,大家都看呆咗,靜了下來,「花前」「月下」两女忍唔住〝咭〞一聲笑出嚟,跟着素心齋內嘅〝各路英雄〞哄的一聲大笑起嚟,有啲仲笑到出眼淚。「厨癡」揮舞手中刀劍,口中唸着〝查督督撑〞喺塲中走咗一個圓塲,面紅紅好冇癮咁走番入厨房。

此時,東灜兄妹走到雨中淋前,十二郎拱手向雨大俠行禮,〝棟〞起隻手指公,口中喃喃自語說:「先生…武功呢…〝依支班〞架」指着雨中淋說:「你…師傅」指着自己話:「我…徒弟架」。原來辛月兄妹來此想拜師。雨中淋好和譪咁同佢地講:「就讓我先處理目前呢件事才說吧。」話剛下,精通舊事古蹟嘅「四脚蛇」嚴卸走到雨中淋面前,拱手說:「據我所知,中土、西域、東沿、南疆、北境都未曾有過一本叫「朋友」嘅秘笈,未知先生所持之秘笈來自何時亦源於何處?」
嚴卸並非有意挖苦雨中淋,而係佢對舊事古蹟求真嘅態度。菊無艶開始後悔自己安排得咁高調,俾两大俠相見同還書;芃澎開始有點着急,同明白師傅雲尼飛鴿傳白紙嘅意思亦懊惱不已。



雨中淋拱手向四方行禮,說:「雨中淋有一事耿耿於懷,這書係在下廾年前從吔烏城偷出嚟嘅!」雖然各路英雄冇乜邊個識得雨中淋,但係由雨大俠如今氣宇軒昂,好難想象佢以前係雞嗚狗盜嘅小偷。嚴卸摸摸下巴,說:「非也!我問嘅係呢本秘笈來自何時、源於何處?」「這我也可不知道!」雨中淋講咗耿懷於心嘅事,如放下心頭大石。



各人眼光轉投在洪湟大俠身上,有心急者搶着問:「本祕笈喺幾時同喺邊度嚟架洪大俠?」「這……」洪大俠再瞪雨中淋一眼,双手握拳越握越緊。呢個時間「瞧余奸毒」知道正是個推波助瀾好事機,說:「洪大俠,雨大俠未偷…(佢將個偷字拉得特別長)本秘笈之前係你保管,你應該知道秘笈出自何處!對嗎?」洪湟大俠一激之下,舉拳「砰」的一聲擊在桌上,整張枱俾打得散晒,木屑四飛,洪湟藉呢一擊卸去了自己一啲怒火。洪湟是個非常正直嘅人,佢話:「冇錯!本秘笈係我六歲嗰時貪得意同個乞兒買番嚟嘅!」





洪大俠此語一出,全塲嘩然!「瞧余奸毒」余樞基老謀心算,想:「洪湟老實唔講大話見稱,但雨中淋偷得秘笈後,居然能夠練得如此修為,呢本秘笈一定唔係咁簡單!」佢轉頭問雨中淋:「雨中淋先生,(稱先生經已好俾面)你可唔可以攞本秘笈出嚟?看個真偽!」個口咁講,双眼仍盯住步輕雲手上嘅包袱。「不在包袱裡面。」雨中淋斯斯然答着。此時余樞基說:「唔係包袱就一定喺佢地其中一個身上。」〝各路英雄〞將一道與雨中淋同嚟嘅五姝包圍起。「咱們就搶吧!」一哄而起,幾十人就圍住六個人就想動手。雨中淋正想解釋;說在此時,樑上躍下一位穿着清雅標緻嘅公子,手執點穴鐵扇,先點倒幾個接近嘅〝各路英雄〞,跟住走入圈內,大家都唔知佢係邊位,只有雨中淋認得佢嘅眼神、菊無艶認得佢嘅身影;「中原一點窮」窮瘋婁,佢行埋無艶姑娘跟前好生硬咁講咗幾年嚟嘅第一句說話:「菊……我…來晚了!」



被點倒嘅幾個漢子,俾其他〝各路英雄〞扔埋一便,咁啱其中一個就係打咗紀氏兄弟幾巴嗰個登徒浪子;佢两兄弟正係仇人見面分外眼明,一枰就枰佢埋一邊,動手就打。〝各路英雄〞只係顧住「圈內」嘅人,其他就好少理。登徒浪子俾窮瘋婁點咗穴,個人唔郁得啫,把口仲講倒野,拼命求饒。紀思磬打到手軟就話:「好!如果你答啱我嘅問題,我就放過你,『棺材佬最喜歡唱嘅歌』係邊一首?」那漢子那知答案。紀鬼卜一拳揼佢個心口說:「係《終有一日等到你》,傻佬!」紀爾雅一向斯文淡定,佢無啦啦俾呢個大漢冚咗两巴,又見到個大佬玩得咁過癮,一時興起「好!如果你將呢首歌倒轉嚟唱,我就放你走。《我等你到天明》!」那漢子又點識唱吖。紀神算打完心口打背脊話「係《明天到你等我》,蠢材!」



包圍雨中淋菊芃五女同窮瘋婁等嘅〝各路英雄〞,武器紛紛在手,有啲卑鄙強徒仲眼色迷迷。此時一聲清嘯:「妹,隨我來!」此人一躍入圈,拱手向雨等說:「讓我盡點棉力。」語方落下,步輕雲亦輕悠飛入叫了一聲:「哥哥!」

來者係「雲端影」步輕雲嘅哥哥「木生公」步如騛。點解佢叫「木生公」,原來佢特別喜歡松,先稱己「松生」年長後拆為「木生公」,見佢手持一枝黑漆色嘅鐵松枝為武器。四秀其他三位見二師姊入戰圈,夢劍羽三女喝道:「我們也來!」也躍入戰圈之內。〝各路英雄〞見圈內人多勢眾,也怕夜長夢多,唔知邊個喝了一聲:「郁手!」……此時菊無艶嬌呼一聲:「芃姊、動手!」佢一躍而起,施展一憂大師在佛經【中論】悟得嘅「八不」〝不生亦不滅,不常亦不斷,不一亦不異,不來亦不出〞指法,將企前面嘅十個八個黑頭布客點倒。無艶姑娘一向跳皮百厭,十多個黑頭布客俾佢點正個〝笑穴〞個個笑到人仰馬翻碌地沙。只見芃澎「眼隨心,意隨心、聲隨心」眼到之處、意想之處、聲到之處,拍拍拍拍!十多個黑頭布客似盲頭烏蠅咁俾打耳光,痛得哭聲震天。呢班黑頭布客真窩囊,十多個笑到碌地,十多個喊到呼天搶地。




余樞基見差唔多損折一半嘅〝各路英雄〞黑頭布客,回頭看見「了斷無痕」寒春日獨個兒企喺牆角,連忙叫道:「春日、上!」此時嘅寒春日經剛才「四秀」叫師父,一時感觸,思父思家,心神一時間迷惘起嚟;余樞基見呼喚咗幾聲毫無反應,佢另計又上心頭。

正此時一位郎中走到寒春日跟前,摘去佢嘅「了斷」劍,取一椅讓寒春日坐下,拉起袖為佢把脈,說:「無大碍!只係暫時失心症狀,若幾天內得人貼身調理應能康復!」此郎中仰首長嘆一聲,說:「春日出自將門之家,父親寒不屈是個硬漢子,單傳得此子,管教嚴明,命春日不能苟行邪道。春日家遭惨變,憤激投於奸徒。剛才感觸令佢分辨唔出正與邪、善與惡,心智煩亂、一時有了失心症狀。」郎中係中原馳名嘅「天涯俠醫」安道全,風趣幽默,既俠既醫。俠醫咀角永遠帶着一絲微笑,佢診症完畢,走向余樞基,拱拱手道:「安某知余先生精讀兵書,謀畧過人,善調兵遣將。余先生仍將相之材,何苦為一小毛小利而敗去自己前程!」余基樞其實也有懷才不遇嘅感慨,但喺咁多英雄豪傑面前,點都放唔低個面子,「小講廢話!咁打法一定係你地贏,秘笈你地一定唔會拎出嚟,好!我有個建議……」雨中淋說:「在下非不交出秘笈,書係我偷,我要親手交回洪大俠,方了在下心願……」洪湟大俠止住雨中淋說話:「就聽這冥頑不靈嘅小子說下去吧!睇睇佢又有啥花招!」




「我假設除咗我地呢班黑頭布客想見識秘笈外,坐中英雄豪傑都會有想見識之士。在下手下不材,那還是請坐中英雄出手吧!」余樞基實行孤注一擲。外面行入一僧一尼,是一憂大師和西域雲尼;一憂行近余樞基說:「雨大俠不是說了親手交回秘笈嗎?」這時洪湟大俠惱於先前余樞基質詢秘笈態度咄咄迫人,拍案而起:「好!就按你的辦!」「我嘅建議好簡單,你我两方各派三位出嚟較量、點到即指,邊一方贏可以話事點處理秘笈,可行嗎?」余樞基道出法子來。「就這樣定吧!不過我有一個條件,你可答應嗎?余先生!」洪湟問曰。「甚麽條件?」「若你方輸咗,你要立即離開吔烏城,今後你若能官居一品才可以再回來!可以嗎?」余樞基靜了靜,心中想:「真英雄啊!」他仰首向天思量片刻:「多謝大俠美意,在下銘記於心,好!就這樣辦吧!」各人見余樞基嘅轉變也深感快慰。




此時為秘笈頓刻變成友誼賽,〝余營〞豪傑中走出两男一女,「挑戰」〝洪營〞英雄;佢地係「華三少」華季曜、「無喜怒」吳楓和女俠「火鳳凰」言自語。大家都笑哈哈四方拱手行禮,連余樞基也樂起來!坐喺一旁嘅寒春日喃喃自語:「我係邊個?」一位年青女俠行近拾起地上嘅「了斷」劍,好仔細咁為寒春日放回劍鞘,微細音聲向佢講:「你係〝了斷無痕〞寒春日、你一定會康復!」素心齋內大多數人都觸目喺「比賽」上面,只有幾位留意到剛才的事。「江南子」文折桂望着這個徒兒,微微的點了頭。



「華三少」拱手向大眾行禮「在下〝華三少〞華季曜,請問有邊位英雄賞面賜教?」人羣中走出一位温文爾雅嘅王孫公子;「中原一點窮」窮瘋婁。公子抱拳行禮,笑曰:「華少俠,有機會同紫微劍主華少俠切磋武術,人生難得有幾回,先與華兄討教,遲些與華兄暢飲!」華季曜:「有機會見識窮兄自創「两窮」功,真三生有幸,大家等累了,先比試比試。等會再暢飲三百杯!哈哈哈……請!」

「請」字一過,两人擺開架式鬭將起來。華季曜右手持「紫微」一劍接一劍向窮瘋婁進避,左手手指不斷點算下招如何進招,此仍「紫微」劍與「斗數」術數配合,一劍出已伏下一劍殺着。窮瘋婁也不退讓,一只鐵扇一張一合、一指一點,卸去紫微劍進襲。「中原一點窮」創嘅〝窮得好陰功〞同〝唔窮冇陰功〞係根据當年佢窮途淪落時,有與冇、窮與富两者心境而悟嚟。两人打咗不下三百回合,忽然停手,抱拳行禮齊聲說:「我輸了!」兩個人都認輸,怎樣輸,只有洪湟、江南子、雨中淋等高手才看得清楚。




一個胖漢走在圈中,左右手各執一班斧,兩斧在抱拳時相擊一下,〝剛〞的一聲,跟住好嚴肅講:「在下〝無喜怒〞吳楓、請賜教!」吳楓之稱之為〝無喜怒〞,因為佢經常木無表情。這時两少女在塲畔跳入塲中,她們就係「花前」同「月下」。两人向吳楓作了揖說:「吳大俠,唔介意我地两個打你一個嗎?」吳楓說:「什麼大俠不大俠,什麽两個打一個,來得正好!」話剛落、便舉双斧進攻。「無喜怒」嘅班斧冇乜套路,只係憑自己一身牛力同有深厚內功,加上一對精鋼練成嘅班斧,喺江湖上有多少名氣。「花前」「月下」两人經常喺芃澎身邊一齊練武,芃女俠徵得師傅雲尼同意,將「心法」續步轉授俾佢倆。「花前」「月下」見双斧來襲,那敢輕率,两女心意相通,心領神會,知道吳楓蠻牛一頭,與其比內力、比武功就一定輸蝕,两妞一時一左一右,或一高一低,一前一後,使畧胖轉身難嘅吳楓、前後左右上下皆是敵。就掌握一個時機两女使嘅短刀同時脫手丟上樑上,吳楓仰首一看,双手還高舉住双斧。「花前」「月上」連忙在左右两側向吳楓左右最低嘅一條筋骨一指點去…… 吳楓〝咭〞的一聲笑了出來!「老夫幾十年未笑過!哈哈!痛快!哈給……」花前月下連忙謝罪:「前輩、晚輩得罪了!」「什麼前輩晚輩、什麼得罪,打得正好!哈哈……」



圈中站出一位英姿颯爽嘅女俠「火鳳凰」言自語,她挑了江南子嘅「關門弟子」姸瓦姑娘做對手,聲言十招之內不取姸瓦便算輸了。小姸瓦先向師父拱手行禮,步出塲中。夢影劍羽都想睇睇師父嘅關門弟子,大家嘅「小師妹」火侯如何。一個赫赫有名嘅火鳳凰言女俠,一個是初出茅蘆嘅小女孩,一眼睇落就立見高下。但係英雄豪傑見小姸瓦先向師父行禮方出塲,知此女武學修為亦不淺,妨且小姸瓦的確係練武嘅好材料。「火鳳凰」見姸瓦步出,經已驚訝不已,好一個少年女俠客嘅風範。
小姸瓦將劍尖向下双手抱拳向「火鳳凰」行禮,然後將劍收在背後,咁樣係後輩與前輩過招時嘅禮貌,姸瓦將此禮儀做得恰到好處,各豪傑亦為之讚嘆不已。言女俠拿出左鳳劍和右凰劍,两劍均長尺半,屬於短劍類。小姸瓦身形高佻,手執一口三尺半「傲然」硬劍,英氣迫人;揮此劍者瀟洒自如、既來之則安之、既去之則安之,一點也無牽沾。言女俠刷刷刷連進三招,好個姸瓦,劍「傲然」不動,閃避了三招,言女俠笑曰:「少俠讓了三招,禮儀足了!進招吧!」姸瓦一聲:「晚輩得罪了!」使出一些很普通嘅劍招,言女俠心想〝看來此女心術嚴謹教養極好,劍術還是普通吧!〞見姸女有一破綻,言女俠双劍左右一剌一削,眾豪傑正欲驚叫時,小姸瓦嘅傲然劍乘鳳凰两劍刺到,點在劍身上,〝叮叮〞两聲。「火鳳凰」連忙收劍,抱劍在手:「少俠留手,要是〝傲然〞點在我手上,我手必廢。」跟着長嘯一聲:「江山代有人才出,自古英雄出少年啊!」小姸瓦向「火鳳凰」深深一揖,紅着臉說:「姸瓦不懂事,冒犯了前輩,請前輩責難!」火鳳凰望着姸瓦,又愛又憐!




此時余樞基抱拳向四方說:「在下願賭服輸,我若不官居一品、不回吔烏城。」「安大夫、洪大俠之言、在下銘記於心!」佢拜別了洪湟大俠連夜上京。



呢個時候輪到洪湟大俠哈哈大笑說:「〝落雨劏雞客〞,江湖恩怨江湖了,我就同你比比游掌,每人選一詞嚟對掌,在詞完前,誰將誰打下便贏,好嗎?」「聽從城主吩咐!」雨答曰。
「好!我就選陸游【卜算子 吟梅】與你比試比試,你選那一首詞?」「我不選,就用【卜算子 】這個詞牌,我〝和〞你一首吧!」

两大俠擺開格式,洪大俠一邊大聲誦吟梅一詞,一邊出掌,雨中淋則一邊沉思和詞一邊出掌。

「驛外斷橋邊,寂寞開無主。已是黄昏獨自愁,更着風和雨。無意苦爭春,一任羣芳妒。零落成泥碾作塵,只有香如故。」

不夠十招,詞已完,勝負未分。是個和局!洪大俠笑着問:「劏雞客,你的和詞是怎樣?」雨中淋說:「見笑了,就讀讀給兄台聽聽。」誦曰:

『風雨送春歸,飛雪迎春到。已是懸崖百丈冰,猶有花枝俏。俏也不爭春,只把春來報。待到山花燦漫時,她在叢中笑。』

洪大俠聽了拱手說:「雨中淋雨大俠,我輸了!」




雨中淋從懷中取出一本殘破不堪嘅本子,上面寫着「朋友秘笈」四個大字,羣雄終於看到其真貌,字寫得好像小孩子寫大字歪倒不正,裡面幾十頁紙,只有其中一頁寫了一個「誠」字,和旁邊有幾點墨印。雨中淋將之放桌上,洪大俠正欲拿起,厨中走出「厨獃」,喃喃自語說:「成個厨房揾張紙〝透〞火都冇!」見桌上一叠「紙」就順手攞咗入厨房。呢個時候冇人再在乎了!


2014年4月22日 星期二

絕代双嬌 5




絕代双嬌 5
文章日期:06/18/2012 09:31 am





絕代双嬌「吔烏城」冰火對决
第五回 邪與正森嚴壁壘 忠與奸刀劍離鞘


樑上少年「徒弟仔」江諾山強搶席中包袱,遭三女俠圍堵,危急之際,席間有两人齊聲喝道:「莫傷我徒兒!」

席間一緩一急衝出两條漢子,似强弩急飛而出者係「了斷無痕」寒春日;佢出身武術世家,父親係當今皇上御禁軍頭兒,被奸人謀害全家被抄。寒春日逃出,身僅帶有父親一口「了斷」劍,從此浪跡天涯,沉默寡言。佢得父授嘅「劍過不留痕」劍法,與「了斷」劍配合,故名為「了斷無痕、六親不認」。



寒春日橫飛而出先襲「雲端影」步輕雲、繞劍橫剌,劍尖如毒蛇吐舌,步輕雲來不及拔出武器,只能藉上乘輕功在樑棟間游走,芃菊一眾都為步女俠不值,亦不屑寒春日所為;人家是女兒家妨且手無寸鐵。步輕雲輕功何等了得,往往在劍舌到時,一側身、一騰空,僅在分厘間避過,群雄睇到目瞪口呆,武功差啲嘅感到頭昏眼花。「南彊青劍」娜拉見自已師姊處境困窘,也顧不上江湖上單打獨鬥嘅規矩,手持五斤十二両青鋼重劍一躍而起,當頭劈落寒春日處,青劍也顧不得劈到那裡,只求將寒春日壓回地面上,解步輕雲樑上之困。寒春日舉「了斷」劍一架當住青劍,噹的一聲,重劍力壓柔劍,寒春日持劍「虎口」被震得隱隱作痛,佢心中叫道:「此柔弱女子竟有此强橫內力!」其實寒春日此想差矣,重劍向下壓當然比柔劍向上招架強橫得多。



此時緩步而出者突然提點,說:「遊劍而上!」寒春日得到提示,劍舌向上繞過青劍直取娜拉……「夢中仙」一躍而出,嬌嗔一聲:「很不要臉!」撲向提點者。

這個緩步而出嘅係「天下極貪」真特醜足智多謀嘅師爺,「瞧余奸毒」(看我奸毒)余樞基。此人面相不差,佢熟讀孫子兵法、資治通鑑,對謀略用兵可算是個難得嘅將帥奇才,只可惜佢心術不正,對武功一點都冇用過功,佢嘅論點係:「謀略勝萬兵」,自己諗個計,交係人地打。不過雖然佢冇功夫,但佢熟識各門派兵器套路,臨陣指指點點。佢可以講係真特醜嘅「腦」,而寒春日係「手」。



夢中仙使出夢仙劍法;此劍比了斷更柔,其弱如絲,揮舞時搖晃如彩帶,挺剌時則似鋼針。不管是揮是剌都使人有目光潦亂,有昏昏欲睡嘅感覺。夢中仙刷刷刷三刺直趨「瞧余奸毒」,余樞基雖然唔識武功,三十六着還是懂得,佢拼命躲藏喺「各路英雄」後面,利用人肉擋箭牌為佢擋住夢中仙嘅招數。如夢姑娘見對方只會左閃右避,全不還擊,知對方冇武功根底,三十多招還未能將佢拿下,有點急嘛,一時急噪,俾還藏身樑上嘅「徒弟仔」睇準時機,用魚綫一圈,套喺如夢持劍手腕上,江諾山才喝道:「莫傷我師傅!」江湖規矩、凡暗算要先揚聲才動手。



說時遲那時快,一聲:「好卑鄙!看鏢!」三枚箭羽鏢嘯聲射出……箭羽鏢係塞外獨有,短箭如鏢,鏢後有鵰羽一片,箭射出鵰羽能夠按擲出時力度轉向。能此箭鏢者係「塞外箭羽」瑪姫,佢見大師姊持劍手腕被套着,急扣三鏢,一支斷漁綫,另两支把江諾山打了下來。



由江諾山搶包袱到佢俾「塞外箭羽」打下只不過係一瞬間嘅時間,「各路英雄」仲未分得出究竟發生乜野事。此時外面傳來笑聲:「哈哈,我還是回去教教四個不長進之徒弟也!」此人內功深厚,眾人聽後有心肺被壓感覺,武功好嘅內力强當然冇事,差點嘅立即吐納數口,氣息至感舒服一啲。「四秀」當然知道係自己師父到咗,即停手退作一旁。

來者係「江南子」文折桂大俠,大踏步進入素心齋,道:「『四秀』打人家一個半加半個都鬥唔贏,丟臉!」大師姊如夢姑娘脹着紅臉,向師父作了揖,道:「師父,他們耍計!」「人家一個狂妄、半個白痴加半個還流着鼻涕……哈哈哈哈……真丟為師的臉呀……哈哈哈哈」文大俠是性情中人,講得好笑之處,自己經已笑餐飽嘅。

「四秀」見師父笑了,知道師父唔係怪責,女兒家嗲嘅天性,吐吐舌頭,向文大俠作一個揖聲叫「師父!」

這一聲「師父」對任何人都不太重要,但係對「了斷無痕」的衝擊就最大,使佢想起亦師亦父嘅父親,他手握了斷劍,緊握了一下,嘞的一聲,沒多人聽到,但有一個人聽得清清楚楚……回首給了一個憐憫嘅眼光,與寒春日四目交投.....



文大俠當然認識洪湟,但係對雨中淋就一啲都唔認識,見雨中淋時拱手顯得好冷淡同唔耐煩。雨中淋當然明白;人家成名時,自己還是個鼠竊狗偷,妨且事隔廿年,有邊個還知道眼前呢個雨中淋喺邊個。文大俠與洪大俠客氣一番,跟住往外輕喚了一聲「姸瓦,入嚟拜見洪大俠洪伯伯。」一個少女跳蹦蹦的跑入嚟向洪大俠作個揖,嚷:「洪伯伯」。「見見你的師姐;夢影劍羽、佢係你地嘅〝小師妹〞姸瓦,如果有日師父〝走咗〞,你地要負責將佢帶大,教妍瓦武功,知道了嗎?」眾女齊聲說:「師父唔會〝走〞嘅」、「師父冇咁快〝走〞」,逗得文大俠開懷大笑:「都未食素心齋呢餐,邊會咁快走吖……哈哈哈哈」。



雨中淋獨坐一旁,悠悠自得,芃菊二女偶然回首看看呢位「大俠」,比起眼前两位赫赫有名的大俠,還不是平凡人一個,但係總覺得呢個大俠同嗰邊两個有講唔出唔同之處

(註:古仔係咁講,雨中淋只係平凡人一個)



正此刻,「瞧余奸毒」咳咗一聲清清噪子,企喺席中,說:「明人說亮話,〝各路英雄〞都喺收到風先至嚟呢度,大家嚟嘅目的都係一樣……」「我地唔係,我地嚟呢度係冇錢交房租,見咁大班人嚟呢邊,咪諗住揾啲生意,真係唔知你地喺度造乜!」講說話嘅緊係紀氏兩兄弟「鬼卜」同「神算」啦,都未講完就俾旁邊幾個〝各路英雄〞喝道:「收聲啦!睇相佬,信唔信打鑊甘過你吖嗱!」話口未完經已有人動手霹霹拍拍打咗紀思磬同紀爾雅各人兩巴。紀兄弟倆認住呢個打佢地嘅人,侍機報仇。



余樞基見自己步署嘅手下經已到得七七八八,施施然咁講:「眾手足、現身啦!」〝各路英雄〞中大部份離坐,企喺余樞基後面、在袖中取出黑布綁喺頭上。余樞基繼續:「大家嚟都係想見識見識本秘笈唧!」鼠目一射射向步輕雲抱在胸前嘅包袱,「雲端影」臉紅了紅喝道:「狂徒,休得無禮。」余道:「恕我無禮,請將包袱給我!」



此時有一個登徒浪子,佢就係打紀氏兄弟嗰個,一步踏前搶步輕雲胸前的包袱,芃澎想這還了得,怒目而視,口中說「打」,拍的一聲,一個其嚮嘅耳光,呢個登徒浪子撼住塊面雪雪叫痛。「大家停手!」一個頭綁黑布嘅大漢大赤赤行出嚟,此人係「口花太歲」瓜啦啦,佢行到洪湟大俠面前,拱拱手說:「敢問城主,吔烏城鎮城之寶〝朋友〞秘笈,是否吔烏城之物」「是也!」一向正直不阿嘅洪城主答。「既然係吔烏城之物,咁即係屬於吔烏城內所有人嘅啦,啱唔啱!」「啱!不過由我保管……」講到呢度恨恨然瞪咗雨中淋一眼。「咁就啱嘞,依家秘笈重出江湖,相信城主唔會吝嗇,就俾在下大家睇睇見識下。」話畢,太歲回個頭嚟向佢嗰班狐朋狗黨打個眼色,扮個鬼樣,懶得戚咁。「這個嘛……秘笈唔喺我手」洪湟再瞪雨中淋一眼。



雨中淋此時正想企起身……又係嗰個「便衣捕快」突然喺另一邊大叫:「頭兒!快捉拿採花賊〝口花太歲〞」話未完两個「便衣捕快」飛身而出,葉捕頭叫都叫唔住,唯有死死地氣也飛身躍出。呢個時候,其中一個捕快抨住呱啦啦個衣襟,「依家我拘捕你,你可以唔講野,可以請大狀……不過……」一把刀經已架喺呢個捕快條頸,「不過依家你走得嘞……」葉捕頭點都諗唔倒自己班衙差咁窩囊,連忙扣出两片葉鏢喝道「放我同伴!」打向持刀客。持刀客頭也不回一反手連抄两鏢,此人武功非比尋常;持刀客係「四脚蛇」嚴卸,佢走遍大江南北見聞廣博,特別係花草樹木,舊事古蹟;武藝登峯造極,今次嚟只係想開開眼界,佢頭上冇綁黑頭布。口花太歲係佢好朋友,其實非大奸大惡,愛花如命,有日見衙門前種有品種極罕有嘅天山小紅花,一時興起想摸一摸,就俾衙差話佢採花、要拉要鎖。



正此間,門外两個頭帶黑布嘅人飛進了來,說是〝飛〞,不如話係俾人家掟入嚟,另两人影隨之撲入。突而其來嘅事令「正邪」兩邊人馬都如箭在弦、刀劍出鞘……
來者何人……乃東瀛十二郎和妹妹花子姑娘……



厨內亦走出一個人,左手執刴菜板刀、右手持素心情長劍,胸背各掛一黑鑊,頭頂戴個瓦煲;走碎步,如花旦小武出塲,唱白:「呔!何許人敢在素心齋樓頭撒野!」……